It(em) want stoet en(de) dissencie opv(er)staen zijn tusscen jouffr(ouwe) magriete(n) va(n)/ meld(er)t weduwe jonch(e)r willems wilen he(re) te montenake(n) en(de) te/ grazen (et)c(etera) ter eenre zijde(n) en(de) jonch(e)r godfroit va(n) mo(n)tenake(n) sone/ der selv(er) jouffr(ouwe) magriete(n) ter ande(re) so hebbe(n) hen de voirs(creven)/ p(ar)tien te(n) ond(er)wise va(n) hare(n) vriende(n) in weer zijden van alle/ tgene des tusscen hen in gescille oft twidracht steet oft gestaen/ mach hebbe(n) totte(n) dage toe va(n) hede(n) gekeert en(de) gesubmitteert
//
in segge(re)n en(de) vriendelike yffene(re)n te wete(n) in jonch(e)r ja(n)ne va(n) wittha(m)/ hee(re) te bout(er)she(m) en(de) te hulde(n)berge jonch(e)r librecht hee(re) te meldert/ en(de) te buedinge(n) (et)c(etera) jacoppe uute(n) lyemi(n)ge(n) hee(re) te wange en(de)/ woute(re) van laethe(m) in sulker vuege(n) dat de selve segge(re)n gesa/ me(n)derhant infor(ma)cie in wed(er)sijde(n) vande(n) voirs(creven) gescille(n) en(de) des/ d(aer) aen cleeft oft in behoeft gewege(n) te zijne sele(n) neme(n)/ en(de) hae(re) uutsprake d(aer) op eendrechtelijc doen bynne(n) xiiii/ nachte(n) naestcomen(de) en(de) hebbe(n) gelooft de voirs(creven) p(ar)tie(n) in wed(er)/ zijden vast en(de) gestentich te houden alle tgene des also bij de(n)/ voirs(creven) segge(re)n also eendrechtelijc uutgeseecht en(de) gesproke(n)/ sal worden lyntre dormale julii xxvii
//