Tvo(n)nis vande(n) gedinge dat voir meye(r) en(de) scepen(en) va(n) loven(e)/ geweest es tussche(n) henricke coulon in deen zijde en(de) janne/ boxsteen va(n) bossuyt die getrouwt heeft lijsbette(n) docht(er) jans/ wijlen bo lorain anders gheheete(n) le taintenir in dande(re) alse va(n)/ eene(n) mudde rocx lijfpensien v(er)cocht int jair xiiii[c] xxxii vier/ dage in oeghst joerise va(n) udekem bijde(n) voirs(creven) wijle(n) janne/ als principael goesse(n) lorain sijne(n) brueder en(de) janne gherve/ als borge(n) vande(n) welcke(n) de voirs(creven) henric coulon de scepen(en)/ brieve met recht ov(er)hadde Vande(n) welcke(n) de voirs(creven) henrick/ coulon betalinge begherde vande(n) principale(n) oft bewisenisse/ nae der stad recht en(de) voirt betalinge vande(n) pachte van/ vi jae(re)n voe(r) v(er)streke(n) totte(n) dage va(n) hede(n) en(de) vand(en) voirs(creven)/ janne boxsteen Midts dat hij de voirs(creven) lijsbet wettige docht(er)/ des voirs(creven) wijle(n) jans lorain getrouwt hadde en(de) met hue(r) de/ have aenvert nae de doot huers vaders en(de) sijns sweers/ dwelc de voirs(creven) henric coulon boet te thoenen Hopen(de) wair/ hij dat gethoene(n) conste dat he(m) de voirs(creven) boxsteen gehouden/ soude zijn sijne(n) heysch voirs(creven) te voldoene en(de) des getroeste/ hij hem ten rechte Op dwelc de voirs(creven) boxsteen he(m) v(er)antw(er)den(de)/ meynde inde aensprake voirs(creven) niet gehoude(n) te wese(n) midts/ dat die jan sijn sweer niet en was Gemerct dat zijn/ sweer hiet jan le tantenir [ta(n)nent?] ov(er) al alle sijne(n) duerdach en(de)/ oic al waer dat zijn sweer geweest soe was sijns sweers/ have nae sijn doot ale v(er)cocht met rechte alsoe hij meynde/ d(aer)o(m)me hij inde scout sijns sweers niet en meynde gehoud(en)/ te wese(n) Wert gewijst bij manisse(n) smeyers nae aensp(ra)ke v(er)antwerde(n)/ en(de) thoenisse van beide(n) p(ar)tien dat de voirs(creven) jan boxsteen/ gehoude(n) sijn soude den voirs(creven) henrick vand(er) coulon sijn scepen(en)/ brieve te voldoen nae dat de wairheit gedrage(n) hadde P(rese)nt(ibus)/ om(n)ibus scab(inis) dempt(o) god(efrido) roel(ofs) oct(obris) xxiiii