It(em) wij michiel abs(oloens) en(de) jacob pynnock scepen(en) te loeven(en) doen cond eene(n)iegelike(n) dat opten/ dach van heden acht(er)volgen(de) den (com)p(ro)misse en(de) v(er)bonde onlanx opgenome(n) voe(r) ons bij/ submissien tusschen de edele en(de) waelgeboirne jonck(er) janne he(re) va(n) [te] glymes te b(er)gen en(de) en(de)/ topvelpe en(de) te bergen t(er) eend(er) zijden en(de) jonck(er) anthonijse van glymes he(re) he(re) van waelhain/ en(de) van melijn (et)c(etera) zijnen brued(er) in dande(re) va(n) alle(n) stoote twidraght en(de) dissencien/ geweest en(de) uutstaende tusschen den selven gebrued(ere)n totten dage toe van heden uut/ wat zaken die comen(de) oft spruyten(de) mogen zijn geweest Des de selve gebruede(re)n/ bij toedoen en(de) raide van hoird(er) beid(er) magen en(de) vrienden navolgen(de) der selv(er) submissien/ hen gekeert en(de) verbonden hadden in de edele en(de) waelgeboirne huer mage en(de)/ zund(er)linge vriende te weten h(ere)n arnde van glymes proefst van merchen hoe(re)n/ oem janne he(re) va(n) bout(er)shem en(de) va(n) huldenb(er)ge raese van graven he(re) van/ hev(er)le en(de) van malijnen (et)c(etera) en(de) daneelen van boechout hoe(re)n oem en(de) neven geloven(de)/ vast en(de) gestentich te houden wes bijden voirs(creven) segge(re)n eendreghtichlic geseeght en(de)/ uutgesproken soude w(er)den Voir ons comen zijn de segge(re)n en(de) vriendelike yffene(re)n/ voirs(creven) navolgen(de) den selven v(er)bonde in tijts en(de) in uren dat [dat] na begrijp van dien/ wael geschien mochte hen te voe(re)n wael en(de) ripelic beso(n)nen en(de) hebbe(n) hoe(r) seggen/ en(de) eendreghtige uutsprake(n) gedaen en(de) gep(ro)nu(n)cieert ind(er) manie(re)n h(ier) na v(er)claert/ Seggen(de) inden yersten dat zij volcomelic bij des(er) hoird(er) uutspraken diffinitijf/ app(ro)be(re)n aff(ir)me(re)n en(de) ratifice(re)n alsulken testame(n)t en(de) ut(er)sten wille als h(er) jan wile(n)/ va(n) glymes he(re) va(n) bergen va(n) grymb(er)gen en(de) va(n) melijn (et)c(etera) ridd(er) vad(er) der selv(er) gebrued(ere)n/ zalig(er) gedachten inden jae(re) onss h(ere)n duse(n)t vierhond(er)t en(de) xxvii gedae(n) en(de) gemaect/ heeft en(de) oic alle alsulke brieve hoedannich die zijn als e(n)nich der selv(er) gebrued(ere)n/ deen opten and(ere)n mach hebbe(n) spreken(de) tot eeuwegen dagen va(n) werde(n) en(de) valeur/ te zijne en(de) bijde(n) voirs(creven) p(ar)tien onv(er)brekelic gehoude(n) te werden Seggen(de) voirt de selve
//
segg(ere)n en(de)a(m)micabelen (com)positeurs voe(r) hoir uutsprake alse van dien xl rijnsch(en) guld(en)/ inden voirs(creven) testame(n)te des voirs(creven) wilen h(ere)n jans gelate(n) jouff(rouwe) g(er)truden p(ro)fesse/ inden goidsh(uys) van s(in)ter clae(re)n te bruessele docht(er) desselfs wilen h(er) jans zust(er)/ der selv(er) gebrued(ere)n opte renten van leefdale na inhoudt vanden selven testame(n)te/ jonck(er) anth(onijse) toebehoiren(de) met zeke(re)n condicien inden selven testame(n)te begrepen/ Welc renten half erflichen half lijftocht wesen(de) eendeels van vrouwe johanne(n)/ weduwe des selfs wile(n) h(er) jans moed(er) d(er) voirs(creven) gebruede(re) bewijst zijn den selven/ goidsh(uys) van s(in)ter clae(re)n ind(er) stad van bruessel op goede den voirs(creven) jonck(er)/ janne metten voirs(creven) testame(n)te toebehoiren(de) en(de) die hij besidt dat alse va(n) dien de voirs(creven) jonck(er) anth(onijse) opte selve zijn rente(n) van leefdale jaerlix de voirs(creven)/ xl gul(den) dragen sal en(de) de goede en(de) pande des selfs jonck(er) jans [oft] zijns/ brued(er)s philipp[(us)] die d(aer) voe(r) verbonden zijn bynnen der stad van bruessel/ geleg(en) d(aer)af tot eeuwegen dagen jairlix lossen en(de) ontheffen also dat de/ voirs(creven) jonck(er) jan ph(ilippu)s zijn brued(er) huer erve nacomeli(n)ge en(de) pande d(aer)af/ eeuwelic onthaven en(de) ontslagen bliven en(de) dat hem vast en(de) zek(er) zijn moge/ Voirtmeer is hoe(r) uutsprake vande(n) duse(n)t gul(den) die de voirs(creven) jonck(er) anthonijs jan/ den voirs(creven) jonck(er) janne [anth(onijs)] zijnen brued(er) heysschen(de) was uut ocsuyn va(n) eend(er)/(com)posicien voirmaels tusschen hen bijden voirs(creven) raese van g(ra)ven en(de) baudewijn va(n)/ glymes hue(re)n oemen gemaect va(n)den lande van melijn en(de) va(n) alle d(er) have(n)/ die de voirs(creven) jonck(er) anth(onijs) opt voirs(creven) slot en(de) goet van melijn bevonde(n) oft/ ae(n)geverdt mach hebben dat van dien en(de) allen tichten oft actien uut dien/ spruyte(n)de de voirs(creven) jonck(er) anth(onijs) voirtaen tot eeuwegen dagen quijt ende/ ongehoude(n) zijn en(de) bliven sal sond(er) dat de voirs(creven) jonck(er) jan uut ocsuyn/ va(n) dien ten voirs(creven) jonck(er) anthonijse zijnen bruede(er) w(er)t d(aer)af e(n)nige actie/ oft aensprake behelt oft naemaels hebben sal mogen in e(n)nig(er) manie(re)n En(de)/ dair toe dat de voirs(creven) jonck(er) jan betale(n) en(de) v(er)nuegen sal sond(er) last des voirs(creven)/ jonck(er) anth(onis) zijns brued(er)s alle alsulke(n) schout als henrick wile(n) van glymes/ brued(er) der selv(er) gebruede(re) sculdich bleef pete(re)n pat tantw(er)pen also dat de/ selve jonck(er) anth(onijs) zijn brued(er) noch de zijne d(aer)af ghee(n)ssins belast en w(er)den/ Es oic hue(r) uutsprake dat de selve gebruede(re) voirtaen in weersijde diene(re)n/ en(de) knechte sullen mogen houde(n) en(de) leiden sond(er) des eens vande(n) and(ere)n/ e(n)nichsins ae(n)tucht oft met woird(en) ov(er)lopen te w(er)den in e(n)nig(er) manie(re)n/ behouden(de) en(de) reserve(re)nde in desen te henw(er)t de voirs(creven) segge(re)n oft va(n)de(n)/ bastarden va(n) bergen naemaels tusschen den selve(n) gebruede(ere)n e(n)nigen stoot/ geviele oft oic donck(er)heit oft questie e(n)nichsins op e(n)nige vande(n) pointen/ voirs(creven) in wat manie(re)n datt wae(re) dat zij d(aer)af altijt hebbe(n) sele(n) hoir/ volcomen bescheid(en) en(de) eendrachtich v(er)clae(re)n gelijc des(er) jegenwoirdig(er) ae(n)[uutt]sprake(n)/ dat insgelix bijde(n) voirs(creven) gebrued(ere)n p(ar)tien onv(er)brekelic gehouden te werden/ sond(er) boeken oft infenige(re)n? in e(n)ig(er) manie(re)n fe(bruarii) xvi