It(em) alse vanden vors(creven) bekenbrieve es d(aer) af vurwerde en(de) openbarlic/ tusschen de p(ar)tijen ondersproken dat dien ond(er) scepen(en) sal blijven liggende/ tot dien eynde gebuerdet in toecomen(de) tijden dat de selve henric sijn/ sone oft de ghene diet aengaen mochte van betalingen van hue(re)n/ vors(creven) rente(n) in gebreke wae(re)n dat sij hen dan mette(n) vors(creven) beken/ brieve sulle(n) mogen behulpen en(de) d(aer) mede met rechte voerts vae(re)n/ Bij alsoe dat sij alsan mett(er) vors(creven) guedinghen en(de) trecepit cesse(re)n/ sullen moeten en(de) d(aer) mede niet mogen voerts vae(re)n Het en wae(re) dat/ sij mett(er) vors(creven) guedingen en(de) trecipit liev(er) hadden te p(ro)cede(re)n dan mette(n)/ vors(creven) scoutb bekenbrieve M(air) eest alsoe dat in daenverden van/ enigen van allen den brieven oft vestich(eiden) dexecucie de(n) vors(creven) henricke/ sine(n) sone oft den ghene(n) diet aencleve(n) mochte d(aer) af te lange gerees/ ofte alsulke zwarich(eit) d(aer) inne gevuelden dats hen verdroet so mogen/ de selve renthiers met dien brieve en(de) vestich(eiden) d(aer) mede dat sij begost/ hebben voerts te vae(re)n cesseren en(de) afstaen en(de) dae(re)n boven voerts/ vae(re)n oft hen gelieft mett(er) and(er) vestich(eit) dwelke sij hebbe(n) late(n) liggen/ en(de) met dier voerts vae(re)n die hen best gelieven en(de) midst duncken/ sal Behoudelic indien dat de vors(creven) jonch(e)r en(de) sijn goede altijt mer/ met eenre vestich(eit) gepraempt en sullen worden en(de) dat hij ende/ sijn borgen met eender betalingen gestaen en(de) passe(re)n sullen sonder/ argelist niet wederstaen(de) beide de vors(creven) gued(inge) en(de) bekenbrieve en(de)/ beiden vestich(eiden) vors(creven) cor(am) eisd(em)