It(em) nijs vanden vorde sone jans wilen vanden vorde es come(n) voe(r) scepen(en) van lovene en(de) heeft ghe/ loeft op sijn lijf en(de) op sijn goet en(de) op lantzoene dat hij ne(m)merme(r) bij hem selve(n) noch bij niemant/ and(er)s hatye viantscap veede noch wangonst draghen noch doen [en] sal tot erleboude van nethen(en) sone/ wilen gords van nethen(en) van lovene noch [tot] bru[e]der noch suste(re)n des voers(creven) erlebouts o(m)me des wille dat/ de voers(creven) nijs te lovene inde vroente ghevanghen en(de) ghehouden heeft gheweest voer alsulken vo(n)nes/ als den voers(creven) erleboude aenghewijst was vande(n) ghedinghe dat de voers(creven) erlebout en(de) nijs ghehadt/ en(de) ghedaen hadden voe(r) den meye(r) en(de) scepen(en) van lovene noch o(m)me der saken wille daer tvoers(creven)/ ghedinghe uut ruerde en(de) quam noch o(m)me en ghene sake die gheschiet es tot op den dach van hede(n)/ Noch de voers(creven) erlebout en(de) sine bruede(r) en(de) suste(re)n daer o(m)me daghen buten lands noch te campe/ eyschen noch and(er)s moeyen in gheenre manie(re)n behoudelec dien heeft de voers(creven) nijs toten voers(creven)/ erleboude of tot sine(n) bruede(r) en(de) suste(re)n yet te eyschen ocht aen te spreken van wat saken dat es/ of sijn mach dat hij dat doen mach voe(r) den meye(r) en(de) scepen(en) te lovene inde banc en(de) nerghent/ elde(r) hier waren ov(er) gielijs de rike en(de) goert boxhoren scepen(en) van lovene int jaer onss he(re)n/ m cccc v den xiiii[sten] dach in meye