SAL7310, Akte: R°167.1 (56 van 113)
Akte R°167.1
Act
Datum: 1414-03-04
Transcriptie
2016-07-25 door xavier delacourtVan sartele vand(er) bruggen en(de)/
joffr(ouwe) ma(r)ien va(n) ov(er)beke/
Item de meyer va(n) loeve(ne)n heeft aengesproke(n) inde(n) rechte/
sarteele vand(er) brugge(n) ende joffr(ouwe) ma(r)ien va(n) ov(er)beke segge(n)de/
de selve meye(r) dat op tijt voerlede(n) een doetslach geschiede/
te buermeerbeke aen ja(n)ne wayboem die ald(aer) van live ter/
doet bracht was va(n) ja(n)ne vande(n) horneke en(de) ja(n)ne vand(er) bueke(n)/
tot welken doetslage alsoe de vors(creven) [meyer] meynde de vors(creven) sarteel/
en(de) joffr(ouwe) ma(r)ie gelt gegeve(n) soude(n) hebben den vors(creven) ja(n)ne va(n)de(n)/
horneke en(de) ja(n)ne vand(er) beke(n) gelijc de selve jan vand(er) bueken/
gekynt en(de) gelijt hadde voe(r) scepe(ne)n va(n) w(er)chte(r) daer hi geva(n)ge(n)/
was en(de) vande(n) dross(ete) va(n) rotsel(air) gericht dwelc de meyer boet/
te bewaerede(n) en(de) inde banc [seggende dat sij d(aer) aen hoe(r) lijf en(de) goet
verboert hadden tot ons gened(ichs) he(re)n behoef va(n) braba(n)t] Daer op dat de vors(creven) sarteel en(de)/
joffr(ouwe) ma(r)ie hen v(er)antw(er)den dat sij tot den vors(creven) doetslage noeyt/
gelt en geloefde(n) noch en gave(n) [de(n) vors(creven) ja(n)ne en(de) ja(n)ne] noch woert en seyden daer om/
dat de vors(creven) jan wayboem bide(n) vors(creven) ja(n)ne vande(n) horneke en(de)/
janne vand(er) bueke(n) van live ter doet bracht mocht wese(n) en(de)/
boede(n) des oec hoe(r) onschout op dat trecht wijsde dat sij on/
schout doen souden Daer op dat de scepe(ne)n gemaent vande(n)/
meye(r) va(n) loeve(ne)n nae aensprake en(de) nae antw(er)de wijsde(n) voe(r) een/
vo(n)nisse wa(n)t de meye(r) hem v(er)meten hadde dat sij dat v(er)mett/
aenhoe(re)n woude(n) en(de) dae(re)n teynde(n) recht daer toe dat de meye(r)/
dach beg(er)de daer op dat de p(ar)tien hen v(er)anw(er)de(n) seggende wa(n)t/
de meye(r) hen va(n) live aenghesproke(n) hadde dat hi gheene(n) dach/[va(n) thoene(n)] hebben en soude maer thoende [hi] yet sij saghent toe De meyer/
antw(er)de meyne(n)de dat hi d(aer) toe dach hebben soude en(de) maende/
d(aer) op de scepen(en) wes va(n) rechte sijn soude Op dwelke sij hen/
beriede(n) en(de) brachten met vollen ghevolge Soe waer de meye(r)/
niet en thoende tot sine(n) en(de) ter scepen(en) opstaene dat de vors(creven)/
sarteel en(de) joffr(ouwe) ma(r)ie quite en(de) ongehoude(n) sijn soude(n) vand(er)/
aensprake(n) die de vors(creven) meyer te hen w(er)t gedaen hadde/
p(rese)nt(ibus) borch(oven) roela(n)ts sw(er)tveg(ere) ty(m)ple gheerts willem(air) mulke/
m(ar)tii iii
Nagekeken door: Greet Stevens , Jos Jonckheer
Moderator: Greet Stevens
Laatste update:: 2016-06-21 door Xavier Delacourt