van janne vander heze soen/ arnts vander heze/ De meyer van loven(en) heeft aengesproken inden rechte janne vand(er) heze soen/ arnts vand(er) heze seggende dat op tiden voerleden de voirs(creven) jan vand(er) heze in/ gelate van stryde handeedich geweest hadde aen willelken coels soen van rode/ en dat d(aer) af een zoene en yffenynge gemaect was bij vriende(n) d(aer) af seggers/ genome(n) wae(re)n twee van elker p(ar)tyen ende dat die iiii seggers seide(n) voe(r) een/ seggen dat de voirs(creven) jan vand(er) heze den voirs(creven) willeken te bet(er)nissen doen souden/ een bedevart te sente joes opte zee te porre(n) tot enen seke(re)n dage die leden is/ ende de voirs(creven) bedev(ar)t niet gedaen dwelc de meye(r) boet te thoenen mette(n) seggers/ ende tot der conden vanden ghenen die daer af te spreken wisten en(de) seide soe/ waer hi dat gethoene(n) conste dat de voirs(creven) jan vander heze gebroect soude/ hebben een bedev(ar)t te sente jacops in galissien te ruchemadouwe een pont/ grote of alsulken bet(er)nisse als de he(re)n de scepen(en) wisen souden Op dwelke de/ voirs(creven) jan vand(er) heze hem met sinen gelev(er)den voersprake verantw(er)dende/ segge(n) dede en(de) kendde dat de voirs(creven) bedev(ar)t hem aengeseeght was vanden/ segge(re)n mar hi hoepte dat alsulken aensprake als de meye(r) van loven(en) te/ hemw(er)t gedaen hadde hem gheen ontstade doen en soude mids deser
//
redene(n) want al wae(re)n de voirs(creven) segge(re)n genome(n) ende gecore(n) gelijc voirs(creven)/ es en(de) al hadde(n) sij hem de voirs(creven) bedevart aengeseeght te doen(e) soe en/ was dat niet geloeft voer scepen(en) noch voer gheen wisers en(de) al waest/ voer goede(n) knapen geseeght soe hoepte hi dat hi niet gebroect hebben en/ soude al en hadde hi de bedevart bynne(n) tijts niet gedaen en(de) hi meyndde oec/ dat den dach [van porren] yerst geweest soude hebben te sente remeys misse neestkomen(de)/ dwelc hi boet te houden te sijnre eed Alsoe dat na aensprake ende ant/ wordt na m(ijn) he(re)n heerlicheit en(de) nae der stad recht de he(re)n de scepen(en) van/ loven(en) gemaent vande(n) meye(r) van loven(en) wijsden voer een vo(n)nisse dat alsulken/ aensprake als de meyer gedaen hadde ten voirs(creven) janne vand(er) heze wert/ den selve(n) janne gheen ontstade doen en soude p(rese)ntib(us) joh(ann)e de borch(oven)/ joh(ann)e de opp(endorp) filio q(uon)dam walt(er)i joh(ann)e de nethen(en) et henr(ico) wante sept(embris) xii/ anno xiiii[c] xxiiii[o]