Cond sij allen lieden dat gheert vand(er) borch es comen in jegewordich(eit) der scepen(en)/ van loven(e) ende heeft ghegeven ende bekent dat hi gheg(even) heeft janne de(n) putte(re) van/ bethekem thof des selfs gheerts geheten ten bruele gelegen te quadeville met/ huysen hoven en(de) allen den wynne(n)den lande dair toe hoe(re)nde Te houden te hebbe(n)/ ende te wynnen van halfmeye dat lestleden ene(n) t(er)mijn van neghen jae(re)n lang/ deen nae dand(er) sond(er) middel volgen(de) elx jaers dae(re)nbynne(n) op de helcht van alle(n)/ den corne ende vruchten op de voirs(creven) lande jaerlix wassende op alsoe dat/ toeghste als tcoren en(de) de vruchten tijtverdich sijn de wy(n)ne die sal doen afdoen/ en(de) inde(n) bant leve(re)n en(de) dan selense gheert of sijn knape van sine(n) wege(n) en(de) de wy(n)ne/ deylen Die gedeilt sijnde sal de wy(n)ne des voirs(creven) gheerts helcht inde schue(r) vue(re)n/ eer hi sijn helcht invue(re)n sal en(de) gheert sal sijn helcht doen derschen op sinen cost/ en(de) de crientsen behoude(n) mar de wy(n)ne sal tcaf en(de) tstroe hebben en(de) de selve wy(n)ne/ sal des voirs(creven) gheerts core(n) en(de) greyn jaerlix alst gedorschen is te loven b(ri)nghen/ Item sal de voirs(creven) wy(n)ne hebben den voirs(creven) t(er)mijn due(re)nde deeusele die henric/ de cuype(re) voirtijts met den voirs(creven) hove gehouden heeft te weten een eeusel/ geheten der nat eeusel een eeusel gehete(n) de seve(n)boend(er) ene(n) beemt geheten/ den groten zijp ene(n) beemt geheten den cleynen zijp It(em) iii dachmael/ beemts gelegen in b(er)them wynkel i dach(mael) beemts daer bi gelege(n) i beemt/her gelege(n) bid(er) molen van heend(er)shem een boend(er) beemts geleg(en) op silshem/ en(de) een cleyn beemdeken gelegen inden nuwenhof [en(de) ene(n) beemt gehete(n) den sleedonc] alle jae(re) den voirs(creven) om/ enendertich cronen te weten veertich placken gemeyns payments/ voir elc crone gerekent jairlix te s(int) m(er)tens misse vallen(de) en(de) onbegrepen/ te half meye te betale(n) den telken t(er)mine als vervolghde schout ende dierste/ betalinge hier af in te gaen van halfmeye naest comen(de) over een jaer en(de)/ niet eer Item sal de voirs(creven) wy(n)ne jaerlix leve(re)n hond(er)t en(de) xxv mandele(n)/ walme(re) de huysingen vande(n) voirs(creven) hove mede te decken en(de) als men die/ verdect sal de wynne den werclieden den montcost gheven [teen en(de) dacroede(n) sinde(n)en(de) den leem steke(n) q(uod) habe(tur) diemen daer behoeve(n) sal] en(de) gheert sal/ de dachue(re)n betalen It(em) sal de voirs(creven) wy(n)ne de lande vande(n) voirs(creven) hove jaerlix/ getidichlic wy(n)nen erien en saeyen wael en(de) loflic te behoirleke(n) tide te weten/ dwynt(er)coren op vier voren de gherste op drie voren ende devene op ii voren/ / It(em) sal de voirs(creven) wynne hebben den bogart die de wynne(n) voirtijts gehad/ hebben altemale te hem wert en(de) den velthof uutgenomen dat gheert sal/ hebben half doeft vanden velthove en(de) jan sal hebbe(n) half de duyve(n) vande(n)/ duyfhuyse int voirs(creven) hof en(de) tduve(n)mest dies sal hi den duve(n) te wynte(r)/ teten gheven It(em) sal de voirs(creven) wy(n)ne jaerlix inde brake een boend(er) lants/ mogen woervruchte(n) en(de) de vrucht allene behoude(n) It(em) sal de wy(n)ne steken/ en(de) halen allen den leem dieme(n) int voirs(creven) hof behoeve(n) sal en(de) hi sal de wende/ int voirs(creven) hof op sine(n) cost houde(n) vand(er) ond(er)ster rikelen nederwert It(em)/ sal de wy(n)ne de g voirs(creven) lande laten te sine(n) uutgaen vande(n) t(er)mine gelijc/ hise vant in sinen income(n) Te weten den art op hynd(er)shem en(de) op de/ seve(n) boend(er) met hoe(re)n toebehoirte(n) besaeyt met wynt(er)corne den [inde(n)] zom(er)art/ xi dach(mael) lants met ghersten bezaeyt en(de) dand(er) met evene(n) en(de) de brake/ te weten tdroeghe rot met den lande daer toehoe(re)nde eens o(m)me gedaen/ It(em) sal de voirs(creven) wy(n)ne sijn b(er)rynge mogen nemen op de voirs(creven) goede/ dair de voirs(creven) gheert hem bewisen sal ter mynst(er) scaden It(em) sal de voirs(creven)/ wy(n)ne ten eynde vande(n) yersten vi jae(re)n vande(n) voirs(creven) goede(n) mogen scheyde(n)/ op dat hi wilt en(de) gheerde dat een half jaer te voe(re)n seggen It(em) sal de/ voirs(creven) gheert den voirs(creven) wy(n)ne jaerlix gheve(n) v ellen lakens tot enen/ rocke van sijnre levereyen Item es vorwerde en(de) ond(er)sproke(n) [dat de voirs(creven) wy(n)ne] m(ijn) vrouwen/ weduwe h(ere)n wouters wilen van quaderebbe ridd(er)s sweg(er) des voirs(creven) gheerts/ vand(er) borch op tvoirs(creven) hof ten bevele den voirs(creven) t(er)mijn due(re)nde houde(n) sal/ eene(n) beer en(de) ene(n) berre [die sij daer seynde(n) sal] int gemeyn gaende en(de) die vuede(n) daer toe sien/ en verwae(re)n gelijc sijns selfs beesten It(em) sal de voirs(creven) wy(n)ne jaerlix m(ijn)/ vrouwe(n) voirs(creven) haer thiende den voirs(creven) hove toebehoe(re)nde in vue(re)n in hoe(r)/ thiendescue(r) daer staende en(de) daer toe leve(re)n ene(n) wage(n) mette(n) p(er)de(n) en(de) ene(n)/ knecht die de waghen drive(n) en(de) laten sal en(de) altoes bereet sijn vroech en(de)/ spade alst te doen sal sijn [en(de) tcoren in hae(r) schue(r) tassen] sond(er) m(ijn) vrouwe(n) cost alsoe dat m(ijn) vrouwe [bi] sinen/ gebreke aen hoer thiende gheen scade en lide en(de) daer toe sal m(ijn) vrouwe/ ene(n) knape houde(n) en(de) seynde(n) op hae(re)n cost en(de) loen die thiende te vergade(re)n en(de)/ te hulpen halen en(de) tcoren en(de) greyn vand(er) alst gedorschen sal sijn ende/ / vand(er) voirs(creven) thiende(n) comen(de) sal de voirs(creven) wynne jaerlix te loven b(ri)nge(n)/ meten en(de) opdragen dairmen hem bewisen sal [ende desgelijx den wijn die vand(er) thienden comen sal te loven(e) b(ri)ngen] en(de) dan sele(n) hi en(de) sijn bode(n)/ den montcost hebben en(de) sijn p(er)de hoey [en(de) de wynne sal behoude(n) caf stroe en(de) ov(er)karen vand(er) selv(er) thiende(n) comen(de)] Item es vorwerde dat de voirs(creven)/ wy(n)ne tcoren en(de) de beemde en(de) eeuse die hi met den voirs(creven) hove heeft wel en(de)/ loflic bevreedt en(de) vermaect laten sal ten afscheyde(n) van sine(n) t(er)mine Item/ is vorwerde dat de wy(n)ne gheen scaerhout noch truncboeme houwen noch/ truncke(n) en(de) sal dan te behoirliken tide en(de) hi en sal gheen opgaende hout/ moghen houwe(n) noch truncke(n) Hier af sijn borghen des voirs(creven) wynnen/ als p(ri)ncipael sculde(re)n ongesund(er)t en(de) ongescheide(n) en(de) elc voir al lambrecht/ en(de) henric put(ter)s sijn brued(er)s Et p(ri)m[(us)] haenwijc vroede ja(nuarii) xxii