It(em) wij henr(ic) vand(er) calste(re)n en(de) arnt vande(n) velde scepen(en) van loven(e) doen/ cond en(de) kenlic allen lieden dat van alsulken stote als opv(er)staen was tussce(n)/ janne coulon d(er) stat knape van loven(e) die ov(er)mids vo(n)nisse van scepen(en) brieve(n)/ van lov(en) beleidt es tot den goeden [beruerlic en(de) omberuerlic] jans rauwelet in deen zijde ende hellijn/ le bisse in dande(re) alse vanden goeden h(ier) nae bescr(even) Te wete(n) vand(er) woenynge(n)/(et)cetera gel (et)c(etera) ni(m)i(n)e(tur) situt p(ri)us stat It(em) vande v cap(uynen) It(em) vande(n) eyken ende/ ande(re)n houte dat de voirs(creven) jan coulon meynde dat de voirs(creven) hellin afgehouwe(n)/ heeft It(em) vand(er) huyshue(re)n vande(n) voirg(eruerde) goede(n) It(em) vand(er) cost die de voirs(creven) p(ar)tien/ om der voirs(creven) saken wille gedaen hebben en(de) voirt van allen ande(re)n stote die
//
de voirscr(even) p(ar)tien und(er)linge hebben tot opte(n) dach van heden [die rue(re)nde] come(n) rue(re)n/ vande(n) voirs(creven) goeden van welken stoote de voirscr(even) p(ar)tien hen gekeert/ hebben en(de) wa(r)en des bleve(n) [sijn op den dach va(n) heden] voir scepen(en) van lov(en) in segge(re)n en(de) vrientlic/ yffene(re)n Te wete(n) de voirs(creven) jan coulon in pete(re)n boys en(de) henric tain/ ginsart en(de) de voirs(creven) hellin in h(e)r(e)n janne henry capellaen van viertain/ en(de) in henr(ic) colingnaz in alsulker vuegen dat de voirs(creven) segg(ere)n die/ vand(er) voirs(creven) p(ar)tien besceide wael te bynne(n) wa(r)en hoir segge(n) d(air) af segge(n)/ en(de) utenen souden op heden mett(er) so(n)nen op dat sijs eens en(de) van accoerde/ consten geworden en(de) en consten sij des niet eens geworde(n) soe/ soude(n) sij neme(n) janne vande(n) plassche tot ene(n) ov(er)man welke segg(ere)n/ om d(er) voirs(creven) saken wille vergad(er)t geweest sijnde des niet en hebben/ co(n)nen eens geworde(n) en(de) hebben de selve sake den voirs(creven) ja(n)ne vande(n)/ plassche als ov(er)man ov(er)ghegeve(n) die sijn segge(n) dair af voir ons/ scepen(en) voirg(enoemt) geseeght ende gepronu(n)cieert heeft ind(er) manie(re)n h(ier)/ nae volge(n)de Inden yersten es sijn segge(n) dat de voirs(creven) woenynge met/ den tsijse den voirs(creven) janne coulon en(de) sijne(n) beleide erflic volgen en(de) blive(n)/ sal sond(er) den voirs(creven) hellin oft sijne(n) nacomelinge(n) d(air) inne e(n)nich recht te/ hebben oft te behouden in e(n)nig(er) manie(re)n met den gevelde(n) houte en(de)/ wassenden houte d(air) op ligge(n)de en(de) staende en(de) dat hellin consente(re)n/ sal alle chirographen ov(er) te gheve(n) die vande(n) voirscr(even) goede(n) ond(er) scepen(en)/ ligge(n) [mogen] en(de) dat de voirs(creven) hellin den voirs(creven) janne coulon ter stont oplegge(n)/ en(de) betalen sal sesse l(i)b(ra) henegouts ghelts alse vand(er) hue(re)n vanden voirs(creven)/ goeden vanden ja(r)e neestleden Noch es sijn segge(n) dat de voirs(creven) hellin den/ voirg(enoemde) janne noch oplegge(n) en(de) betalen sal de huere vande(n) voirs(creven) goede(n)/ van seve(n) ja(r)en voirleden van elken ja(r)e vi l(i)b(ra) henegouts g(helts) ten wa(r)e/ dat de voirs(creven) hellin conste gethoene(n) nae den lantrechte dair de voirs(creven)/ goede gelege(n) sijn dat hij die betaelt hadde en(de) also v(er)re hij dat also/ thoende soe soude hij d(air) mede gestaen It(em) alse vand(er) cost vande(n)/ scepen(en) she(re)n van viertain ende waelravens dayne int come(n) en(de)/ wed(er)ke(re)n en(de) vand(er) cost vande(n) segg(er)s en(de) vande(n) ande(re)n goede(n) ma(n)ne(n) om des(er)/ sake(n) wille gedaen die te same(n) gedreeght op twelf g(ri)pen es sijn segge(n) dat/ de voirs(creven) jan coulon deen derdel en(de) de voirs(creven) hellijn dand(er) twee derdel gelde(n)/ en(de) betalen selen en(de) of d(air) o meer costs op ghinge dien soude(n) sij ind(er) selv(er) voege(n)/ betale(n) Te wete(n) de voirs(creven) jan coulon deen derdel en(de) de voirs(creven) hellijn de twee/ derdel Ende es noch sijn segge(n) dat de voirs(creven) p(ar)tien mids dese(n) segge(n) voirs(creven) p(ar)tien/ geslete(n) en(de) v(er)enicht selen sijn van allen stoote die sij und(er)linge hebbe(n) tot opden dach toe/ van heden Voirt es sijn segge(n) dat de voirscr(even) hellin den voirscr(even) ja(n)ne rauwelet en(de)/ sijn goede quijtscelde(n) sal tot ewelike(n) dage(n) en(de) hem ne(m)mermeer aenspreke(n) met/ gheene(n) rechte gheestelic oft weerlic in e(n)nig(er) manie(re)n welke segge(n) aldus geseeght/ en(de) gepronu(n)cieert de voirs(creven) p(ar)tien [malc ande(re)n] geloeft hebben vast en(de) gesteedich te houde(n) en(de) te voldoen/[en(de) deen den ande(re)n d(air) af altijt gnoech te doen] also dat elke(n) van hen vast en(de) seker sijn moege tot eeuwege(n) dage(n) Gegeve(n) (et)c(etera)? maii xxv