It(em) want stoet en(de) tebat opv(er)staen is geweest tusschen janne ancheal/ wonen(de) te jauche in deen zijde et librecht formal man en(de)/ momboir magriete(n) ancheal sijns wijfs suster des voirs(creven) jans/ in dande(r) van seke(re)n erfgoede(n) gebleve(n) den voirs(creven) p(er)sone(n)/ vand(er) doot roggon caisin [wilen] huers oud(er) vader en(de) h(er)/ jacoppe boursal wilen hue(re)n oem soe sij beyde voirs(creven)/ p(ar)tien come(n) voirs(creven) scepen(en) van loven(e) en(de) hebben hen vande(n)/ voirs(creven) stoete gekeert en(de) gesubmitteert in segge(re)n ende/ vrientlic yffene(re)n te weten de voirs(creven) ja(n) ancheal in/ mathijs mathir de jauche en(de) lancelot le begge/ en(de) de voirs(creven) librecht in engelb(er)t van g(ra)ven nat(ur)lic/ en(de) reynchon de mollebais op also dat de voirs(creven)/ segge(re)n die van beyd(en) p(ar)tien rechte en(de) bescheide/ geinformeert sijn hue(r) seggen vande(n) voirs(creven) stoete/ sond(er) vertreck uutseggen en(de) p(ro)nu(n)cie(re)n sullen/ ende soe wes de voirs(creven) iiii segge(re)n vande(n) voirscr(even)/ stoote eendrechtichlic uutseggen selen dat hebbe(n)/ geloeft beyde voirs(creven) p(ar)tien vast en(de) gestentich te/ houde(n) en(de) deen den ande(re)n d(aer) af altijt genoech/ te doen abs(oloens) vynck maii xxi