Cond zij allen lieden dat in jegewoirdicheiden der scepen(en) van loven(en)/ h(ier) nae genoempt comen sijn henric van tolmaer in deen zijde en(de)/ magriete smans in dande(re) ende sijn bij onderwijse goet duncken/ en(de) rade van hue(re)r beyder vriende eens worden van alsulken/ stote als sij underlingen hadden van eene(n) weghe gelegen/ tusschen hue(re)r beyder huyse opten [dweersen] keyberch tusschen de/ goede arnt heydemans en(de) yden mertens der poente(n)/ h(ier) nae verclaert Inden yersten dat de poirte(n) hangen(de) voe(r)/ ter straten en(de) de dore hangen(de) aen tusschen beyde de acht(er)ste/ huyse der voirs(creven) p(ar)tien aen den hof ald(aer) selen bliven hangen(de)/ en(de) sluyten aen de stile van beyden huysen gelijc sij nu/ staen en(de) dat de voirs(creven) magriete de selve poirte en(de) doe(r)/ op hue(re)n last houden sal en(de) tgebruyc vande(n) voirs(creven) wege/ beghinnende voe(r) aen de strate en(de) also lijnrechte doe(r) gaen(de)/ tot inde(n) acht(er)sten hof sal de selve magr(iete) alleene hebbe(n)/ en(de) behouden tot eeweliken dagen sonder den voirs(creven)/ henr(icke) d(aer) inne e(n)nich recht te behoude(n) Behoudelic/ dien of hij aen sijn voirs(creven) huys e(n)nichs wercs behoefde/ van plecken decken of ty(m)me(re)n dat hij op den voirs(creven)/ wech soude mogen verke(re)n en(de) sijn gerief doen sond(er) der/ voirs(crven) m(ar)gr(iete) aen hue(r) goede e(n)nige scade te late(n) gescien/ Ende alse vander doe(re)n hangen(de) inden doerwech tussce(n)/ der voirs(creven) p(ar)tien huyse aen den hof staende is vorw(er)de/ en(de) ondersproken dat de voirs(creven) henr(ic) van tolmar die/ t(er) stont sal doen vermaken alse dat hij noch nyema(n)t/ anders d(aer) inne noch doe(r) en sal mogen verkee(re)n En(de)/ alse vande(n) vrede staen(de) tusschen de twee cleyn vorste hove/ d(er) voirs(creven) p(ar)tien [en(de) den achtersten hof dien sij half en(de) half deylen selen] is ondersproken dat de voirs(creven) p(ar)tien dien [vrede] te gelike/ en(de) op hue(re)n gemeynen cost houde(n) selen Welke poenten/ de voirs(creven) p(ar)tien geloeft hebbe(n) malcande(re)n te voldoen/ en(de) gestentich te houde(n) teewege(n) dagen voe(r) hen en(de)/ hue(re)n nacomel(ingen) cor(am) roel(ofs) borch(oven) no(vembris) vii