Van willem de kempene(re)/ Het sijn comen in rechte inde banc voir meyer en(de) scepen(en) van loven(en) jannes/ claes die overmids vonnisse van scepen(en) brieven van loven geleyt is tot allen/ den goeden beruerlic en(de) omberuerlic henrix van lare soe waer/ die belegen sijn in deen zijde en(de) willem de kempene(re) van/ nederhockezele als momboir gheertruyden claes sijns wijfs/ daer de voirs(creven) jannes versochte met sijnen gelev(er)den voir/ spreke want de voirs(creven) willem hem ongebruyc dede aen/ een half boender lants leens gelegen te nederhockezele/ op dwarsvelt tusschen de goede steven claes en(de) de goede/ des cloesters van sinte mychiels comen(de) met den eene(n)/ eynde aen der ca(m)men hof dat hij sijn hande dair/ af lichten soude en(de) datmen hem in sijne(n) beleyde/ vande(n) voirs(creven) goede(n) hielde Dwelc geschiet dede de/ voirs(creven) willem een aensprake ten voirs(creven) ja(n)nes w(er)t met/ sijnen gelev(er)den voirspreke in deser vueghen seggende/ dat hij der voirs(creven) gheertruden na staet der heiligher/ kerken getrout hadde en(de) dat de selve gheertruyt tvoirs(creven)/ stuck lants gecocht en(de) vercregen hadde jeghen henr(icke)/ van lare en(de) daer af guedinge ontfaen vanden/ selve(n) henricke voir den stedehoude(r) of meye(r) des hee(re)n/ sabs van sinte mychiels Daer af datme(n) de voirscr(even)/ goede te leene hielde en(de) den ma(n)nen van leene/ des abs voirscr(even) en(de) dat gesciet wae(r) eer de voirscr(even)/ jannes tot den voirs(creven) goeden beleyt was Seggen(de)/ voert de voirs(creven) willem dat t(er) tijt als de voirs(creven) gued(inge)/ gesciede een geheten jannes van lare die na den/ rechte der stat van loven voir de vors(creven) guedinge/ tot den voirs(creven) goeden des voirs(creven) henrix van lare/ geleyt was tselve sijn beleyt quijtgescoude(n) hadde
//
Ende dat alle de poenten voirs(creven) waer wae(re)n en(de) also geschiet/ boet de voirs(creven) willem de kempene(re) te thoenen en(de) met den/ mynsten daer hij mede liden mochte inde(n) rechte hoepte/ en(de) meynde of hij de voirs(creven) poente(n) bij gebrenge(n) conste/ dat hem de voirs(creven) goede volgen soude(n) en(de) sculdich wae(re)n/ te volgen Versuekende aen den meyer van loven(en) of/ de voirs(creven) jannes daer jegen seggen woude dat hijs/ hem keerde aen de he(re)n scepen(en) van loven(en) en(de) daets/ hem een vonnise en(de) dae(re)n teynden recht Daer/ op de voirs(creven) jannes hem verantw(er)dende dede seggen/ met sijnen gelev(er)den voirspreke dat de voirs(creven) aensprake/ hem gheen onstade noch letsel doen en soude/ want de voirs(creven) henric van lare tvoirs(creven) stuc lants/ besat als sijn proper erve ten tijde als hij tot den/ goeden des voirs(creven) henrix beleyt en(de) was en(de) dat/ boet hij te thoenen en(de) met den mynsten (et)c(etera) Seggen(de)/ of hij dat gethoenen conste dat hij na de heerlich(eit)/ ons gened(ichs) he(re)n en(de) den rechte d(er) stat van loven(en) inde/ voirs(creven) goede bliven soude en(de) dat de selve hem en(de)/ sijnen voirs(creven) beleyde sculdich wae(re)n te volgen en(de) soe/ waer de voirs(creven) willem des niet doen en woude v(er)socht/ hij aen den meye(r) van loven(en) dat hijs hem kee(re)n/ woude aen de scepen(en) van loven(en) en(de) doen hem/ des een vonnisse hebbe(n) Also dat na aensprake/ en(de) verantw(er)den de meyer maende de scepen(en) van/ loven(en) wes met den rechte sijn soude De welke/ hem beraden hebben(de) wijsden voe(r) een vonnisse want/ hen beyde de voirs(creven) p(ar)tien thoenisse vermeten hadden/ dat sij dat beg(er)den taenhoe(re)n en(de) dae(re)n teynden recht
//
Ten daghe van thoenisse thoende de voirs(creven) willem met henricke/ en(de) janne claes gebruede(re)n dat de voirs(creven) willem der voirs(creven) g(er)truden/ na state der heiligher kerken getrout hadde Thoenende/ oec de voirs(creven) willem met pete(re)n de smet stedehoude(r) en(de)/ meye(r) vanden leenen des abs van sinte mychiels in sijne(n)/ hof te nederhockesele dat hij daer ov(er) was als meye(r)/ daer de voirs(creven) gheertruyt voe(r) hem en(de) den ma(n)nen/ van leene des voirs(creven) abs guedinge vande(n) voirs(creven) goede(n)/ ontfinc na des hoefs recht Tuyghden voert de voirs(creven)/ henric en(de) jan claes ma(n)nen van leene inde(n) hof/ voirscr(even) bij hue(re)n eede [datmen de voirs(creven) goede vande(n) voirs(creven) abdt te leen hielde en(de)] dat sij met janne van cutseghe(m)/ diemen hiet scorreken en(de) janne mathijs oec/ ma(n)nen van leen inde(n) voirs(creven) hof t(er) tijt als sij leefden/ daer bij en(de) over wae(re)n als ma(n)nen daer de voirscr(even)/ gheertruyt de voirs(creven) goede ontfinc en(de) daer inne van/ den voirs(creven) henricke van lare gegoedt waert na/ des hoefs recht en(de) dat dat gesciede voir den/ voirs(creven) beleyde dat des de voirs(creven) ja(n)nes op de goede/ des voirs(creven) henrix heeft Thoende voert de voirs(creven) wille(m)/ met den voirs(creven) henricke en(de) janne claes dat een de voirs(creven)/ jannes van lare die voir de voirs(creven) guedinge tot den voirs(creven)/ goeden beleyt was sijn beleyt vande(n) selve(n) goede(n) quijtscout/ hoepte daer om de voirs(creven) willem want hij sijns thoenisse/ wel volcome(n) wae(r) dat hem de voirs(creven) goede volgen soude(n)/ Alse de voirs(creven) jannes sijn waerheit hadde doen eede(n)/ thoende hij met pete(re)n van lare en(de) willem de/ leeu dat de voirs(creven) henric van lare de voirs(creven) goede/ besat en(de) als sijn erve en(de) na dat [doen] den brieve bekent/ was daer uut dat de voirs(creven) jannes beleyt ware
//
Na den welken de meye(r) van loven(en) uut versueke van/ beyde den voirs(creven) p(ar)tien maende de scepen(en) van loven(en)/ die wijsden na dat sij hen d(aer) op wael berade(n)/ en(de) besproken hadden voir een vonnisse na aensprake/ verantw(er)den thoenisse en(de) allegacien van beyde/ den p(ar)tien dat den voirs(creven) willem(me) de kempene(re)/ tvoirs(creven) half boender lants leens [als momboir sijns wijfs] volgen soude/ P(rese)nt(ibus) nych(olao) k(er)smak(ere) god(efrido) roelofs stephano smacht/ henr(ico) de borch(oven) walt(ero) ca(pelle)[man] joh(ann)e de ov(er)wynge/ et walt(ero) smet dec(embris) quarta