Uut dien dat op den dach van heden comen is bijden raide vand(er) stat/ raes van graven he(r) te heverle ende malevien ende met hem symoen/ spouren van graven daer de voirs(creven) raes opdede hoe onlanx voirleden/ seker gescil opverstaen ware tusscen den voirs(creven) symone in deen sijde en(de)/ de weduwe renchons wilen van liesch sweger svoirs(creven) symoens he(re)n ja(n)ne/ moni(n)c en(de) h(e)r(e)n reyne(re)n priestere sonen der voirs(creven) weduwen en(de) philippaerde/ masaleyne die haerer dochter heeft in dande(re) mids ocsuyne van enen/ beleyde dat de voirs(creven) symoen hadde doen doen op alle de goede/ die waren des voirs(creven) reynchons wilen mids dat de voirs(creven) prieste(re)n de/ deylinge vanden voirs(creven) goeden van hen ende hue(re)n vrienden gemaect/ naemails breken ende te nieute doen wouden die dair af een middelinge/ en(de) seggen geseeght heeft dwelc hij dede lesen voir den raide/ vander stat ende dat der stat op reden docht staende Soe is/ overdraghen inden raide vander stat datmen den voirs(creven) p(ar)tien scriven/ soude dat sij tvoirs(creven) seggen voldaden ende hoir antweerde dair af der stat/ lieten weten bynnen xiiii nachten naestcomen(de) oft wair sijs niet en/ daden soe soudemen den voirs(creven) symone den voirs(creven) beleydt brief wed(er)/ in sijnen hande(n) doen wedergheven alsoe hij dien hadde eer hij tvoirscr(even)/ seggen aenghinc Actum in pleno consilio octobr(is) ultima