Cond zij alle(n) lieden dat peter ty(m)mermans ende jan de becke(re) beyde van werchte(re) / Sijn come(n) in jeg(ewordicheit) der scepen(en) van loven(en) ende hebben genome(n) ende bekent dat sij / genome(n) hebben jegen h(er) woute(re)n van assche tolwerde(re) ende poertier [des cloesters] van vileer / de beemde des voirs(creven) cloesters hoire(n)de totter poirte(n) van vileer hier [nae] bescreve(n) / Te weten de bladerbroecbeemde houden(de) omtrent xi boend(er) luttel mijn oft meer / gelege(n) inde p(ro)chie van werchte(re) opde deme(re) aldaer Te houde(n) ende te hebben / van sinte m(er)tens misse lestleden eene(n) t(er)mijn van twelf jae(re)n lang deen nae dand(er) / sonder middel volgen(de) Elx jaers dae(re)nbynne(n) om eene(n)vvijftich rinsche gulden(en) / der munte(n) der vier coervoste(re)n van goude goet en(de) gheve oft de werde daer / af in ande(re)n goede(n) goude alle jae(re) te sinte m(er)tens misse inden wynt(er) te betale(n) jaerlijx / de(n) voirs(creven) h(er) woute(re)n totte(n) voirs(creven) poirte(n) behoef jaerlijx de(n) voirs(creven) t(er)mijn duere(n)de / q(uo)lib(et) ass(ecutu)[m] It(em) es vorwerde dat de voirs(creven) peter ende jan ter stont opde voirs(creven) / beemde plante(n) selen ii[c] levender poten Item sele(n) de voirs(creven) peter ende jan ter / stont doen make(n) eene(n) nuwe(n) dijck met eender cleynder arcken jege(n) de deme(r) / alsoe hoege datt(er) den beemden med beholpe(n) zij sonder afslach vander so(m)men / voirg(enoemd) It(em) sele(n) de voirs(creven) peter en(de) jan te(n) uutgaen vanden voirs(creven) t(er)mijn de(n) / voirs(creven) dijck metter arcken alsoe wel gerepareert late(n) gelijc sijte(n) nu van nuws / sele(n) doen make(n) h(ier) af sijn borge(n) der voirs(creven) p(er)soene peter de becke(re) brued / sone des voirs(creven) jans en(de) arnt van vileer beyde van werchte(re) Et duo p(ri)mi [It(em) es vorwerde waert alsoe dat bynne(n) den voirs(creven) t(er)mijne(n) enich een of meer vanden voirs(creven) borge(n) gebrake oft aflivich worde het wae(re) een oft meer dat dan de voirs(creven) peter en(de) jan bynne(n) xiiii nachte(n) nae manisse des voirs(creven) h(er) wout(er)s eene(n) oft meer gelike borge oft borge(n) setten sullen] hug(ar)d(en) lang(rode) dec(embris) viii nona