Van jannese vanden hove/ It(em) uut dien dat jannes vanden hove poirte(r) van loven(e) comen es/ voer den rade vander stat opdoende dat de scouth(eit) van lyre tande(re)n/ tijden hem opgedaen hadde zeke(re) poenten inde welke hij hem mesdrage(n)/ soude hebben en(de) mids dien verbuert zijn vorsterie van lyre eve(n)verre/ men dair op procede(re)n woude Ende oic hadde de selve scouth(eit)/ over hem informacie gedaen geseeght en(de) faem gemaect dat de/ voirg(enoemde) jannes zijn sekerh(eit) die hij onder eed gedaen hadde gebroeke(n)/ soude hebben en(de) mids dien zijn vorsterie v(er)buert Welke saken/ soe de voirg(enoemde) jannes seide bloetelijc toequamen om deswille/ dat hij hem voir hem en(de) de sijne mette(n) rechte van scepen(en)/ brieven den vriheiden van sinte pet(er)s manscapen en(de) poirterien/ van loven(e) soude hebben beholpen In contrarie(n) den lantrechte
//
van lyre hem ten slote beduchtende de voirg(enoemde) jannes dat uut/ des voirscr(even) es e(n)nige hen ghepijnt hadden oft pijnen mochten/ de voirs(creven) vorsterie te willen v(er)volgen en(de) te gecrigen Versueke(n)de/ d(aer) om de selve jannes als poirte(r) dat hij h(ier) inne alsoe besorght/ worde dat hij om trecht vand(er) stat te vervolgen(e) gheen acht(er)deel/ en gecrege en(de) dat hem de voirg(eruerde) woirde zijnre ee(re)n aengaende/ gebetert worden Soe es de voirg(enoemde) scouth(eit) dair om ontboeden/ voir de stad aldair hem de voirg(eruerde) saken int lange opgedaen/ worden nae den welken hij genoech in sijn verantwoirde kynde/ dat hij den voirs(creven) ja(n)nese de voirs(creven) woirde voir de wet van/ lyre voirmaels opgeseeght hadde mair dier wair hij en(de)/ de stat van lyre te vreden geweest Seggende voirt dat/ hij den voirg(enoemde) jannese de voirs(creven) woirde zijnre eeren jegen/ gaende niet over geseet en hadde mair seide dat hij hadde/ ho(r)en seggen dat de voirs(creven) jannes zijn sekerh(eit) en(de) eed tant/ werpen gebroecken hadde Nae den welken de raid vander/ stat getermineert heeft en(de) den voirs(creven) scouth(eit) v(er)socht en(de)/ bevolen dat hij de voirg(eruerde) informatie alsoe wederleggen/ en(de) verhueden sal dat den voirs(creven) ja(n)nese dair om gheen/ letsel aen zijn vorsterie noch andersins en gesciede want/ oft geboerde de stat soude dat verhalen aen sijn lijf en(de)/ aen zijn goede en(de) eve(n)verre de voirg(enoemde) jannes de voirscr(even)/ woirde ov(er) zijn eere gesproeken bij brengen woude over/ den voirg(enoemde) scouth(eit) voir den rade vand(er) stat De stat/ sal hem dair af behoirlijke richtingen doen gescien/ Actu(m) in pleno consilio octobr(is) x[a]