Tvonnisse tusscen pirarde van duwecheal sone naturlics pirarts wilen/ van duwecheal die geleyt es totte(n) goeden m(ar)grieten le foreye/ weduwe jans willen jannar in deen zijde en(de) arnde van oerbeke molde(re)/ die geleyt es totten goeden henrix arnts en(de) clarissien kynde(re) arnts/ wilen a(n)nemans in dande(re) alse vander helcht van ene(n) huse en(de)/ hove gelegen te loven inde nuwestrate bij sinte qui(n)tens tusscen/ de goede jans vranx en(de) de goede henrix van gretteken dwelc/ de voirs(creven) arnt uut machte van zijne(n) beleide aensprac meyne(n)de/ mids seke(re)n reden(en) inde helcht gericht te wesen vanden welken/ de voirs(creven) pirart de contrarie hyelt bij alrehande woirden die/ hij dair toe dede allige(re)n dair op beyde p(ar)tien gewijsdten/ worden tot hoe(re)n bethoene(n) en(de) nae dat zij in beyden zijden/ gethoent hadden es gewijst bij vo(n)nisse der scepen(en) van loven/ dat alsulken aensprake als de voirs(creven) arnt gedaen hadde totte(n)/ voirs(creven) pirarde dat die den selve(n) pirarde geen ontstade doen en/ soude ende voirt hadde pirart den voirs(creven) arnde yet aen/ te spreken dat hij dat doen mochte en(de) metten rechte p(rese)nt(ibus)/ pynnoc opp(endorp) rijke kersmake(re) velde vynck(enbosch) willem(air) m(ar)tii xiiii/