Cont zij allen lieden dat voir den meye(r) en(de) scepen(en) van loven(e) te/ weten he(re)n lodewijcke py(n)noc ridde(re) janne van oppendorp lodewijcke/ de rike claze de kersmake(re) arnde vande(n) velde [arnde van vyncke(n)bosch] en(de) vrancke/ willemair sijn comen in rechte h(er) wout(er) van hugarden proefst/ scloest(er)s van ghempe tsh(er)togen eylande bij ghempe in deen zijde/ en(de) willem de gheyse(re) die na den rechte der stad van loven(en) geleit/ es tot den goede(n) have en(de) erve willems van ophem beckers Ald(aer)/ de voirs(creven) proefst een aensprake dede ten voirs(creven) willem(me) w(er)t en(de) sine(n)/ beleide seggen(de) dat tvoirs(creven) godshuys gronthe(re) wae(re) van eenre/ ca(m)men met hue(re)r toebehoirte(n) gelegen te du(n)berge tussche(n) den/ weddenpoel op deen zijde de goede jans blanckarts op dande(re)/ zijde de woni(n)ge wout(er)s vande(n) velde op de derde zijde en(de)/ de goede goerts blanckarts opte vierde zijde en(de) dat mids seven/ broeden gront tsijs die tvoirs(creven) godshuys opte voirs(creven) ca(m)me hadde/ en(de) met meer ande(re)n tsijse en(de) goede(n) van onsen gened(ichs) he(re) te/ leene hielde opdoende voert dat een out recht wae(re) soe/ wie gront chijs hadde en(de) die(n) te leene hielde van e(n)nige(n) he(re)/ en(de) dan opten pant gebruwen worde dat de gronthe(re) van elken/ broussele sculdich wae(re) te hebben(e) voe(r) camchijs drie gelte(n) biers/ Seggen(de) voirt de selve proefst dat zijn voirseten proefsten inden/ voirs(creven) godshuyse den voirs(creven) camchijs gehave(n) hadde(n) en(de) dair af in/ possessie(n) geweest over xxx jae(re)n en(de) dage welke poenten/ de voirs(creven) proefst p(rese)nteerde te thoenen mette(n) minsten d(aer) mede hij/ liden mochte inde(n) rechte versueken(de) dair o(m)me dat hem sinen/ voirs(creven) camchijs volgen mochte gemerct dat op sine(n) voirs(creven) pant een/ ca(m)me stonde en(de) dagelijx gebruwen worde dat hij oic boedt te/ thoenen [p(rese)nteerde voert de voirs(creven) proefst oft hem sijn voirs(creven) thonisse niet genoech en wae(re) inden rechte op den voirs(creven) campchijs inde(n) name vande(n) godsh(uys) sijn behout te doen alsoet behoerde] Dair op de voirs(creven) willem(me) de gheyse(re) hem verandworde/ seggen(de) met alrehande worde tot sine(n) bescheide te mogen dienen/ en(de) onder den ande(re)n dat hij vand(er) voirs(creven) ca(m)men sculdich wae(re) te geven/ drie gelten biers den kijnde(re)n laureys van elken brousele die dat over/ xxx jae(re)n gehaven hadden en(de) sculdich wae(re)n te hebben hopen(de) ten
//
slote dat de voirs(creven) proefst sijns v(er)meets niet volcomen en soude/ alsoe dat de voirs(creven) scepen(en) gemaent vande(n) meye(r) wijsden/ beyde den p(ar)tien tot hue(re)n bethoene ende dbehout des voirs(creven)/ proefst behielde(n) de scepen(en) tot hemw(er)t Ten daige van thoene(n)/ thoende de voirs(creven) proefst inder substancie(n) genoech tgheene des hij/ hem v(er)meten hadde Dair na thoende de voirs(creven) willem oic alre/ hande(n) poenten hem inden rechte cleyn te stade comen(de) de/ voirs(creven) scepen(en) voirt gemaent na aensprake verandworde ende/ thonisse van beyde den p(ar)tien wijsde(n) voir een vo(n)nisse soe/ wair de voirs(creven) proefst na sijnre p(rese)ntacien sijn behout dede/ als recht dat de godshuyse hue(re)n camchijs volgen soude/ Na desen v(er)socht de voirs(creven) proefst dach van rechte te doen/ sijn behout te doen dwelc hem gesciede alsoe dat hij opte(n)/ dach datu(m) des briefs comen es voe(r) den meye(r) en(de) scepen(en) van/ loven(e) voirg(enoemt) inde banc sijn hant op sijn borst leggen(de) alsoe [gelijc]/ dat behoirt en(de) heeft gheswoe(re)n dat sijn voirsete(n) proefst inde(n) voirs(creven)/ godshuyse over xxx jae(re)n en(de) dage gehadt en(de) gehave(n) hadde(n) opte/ voirs(creven) ca(m)me van elken brousele drie gelten biers oft drancx alsulk/ alsmen dair broude alse des voirs(creven) godsh(uys) erf camchijs ende dat/ hij als proefst inde(n) voirs(creven) godshuyse den selven camchijs telke(n) brousele/ noch dair aen hadde alse des voirs(creven) godsh(uys) erf camchijs Dit gedaen/ soe sijn comen jan boekel en(de) aelbrecht tans wettige ma(n)ne en(de) hebbe(n)/ geswoe(re)n bij hue(re)n eede ten heyligen dat den eet die de voirscr(even)/ proefst gedaen hadde goet gherecht wae(re) en(de) o(n)meynedich Des/ te getuge hebben wij scepen(en) van loven(e) voirg(enoemt) onsen scepen(en) zegelen/ hier aen doen hangen opten tweesten dach van octobri int jair ons/ he(re)n dusent vier hond(er)t tweenveertich