It(em) het zijn comen inden rechte voe(r) meye(r) ende scepen(en) van loven(e) joncffrouwe/ marie hollants weduwe jannes wilen hollants ende henne(n) ende gheert hollants/ gebruede(re) hue(r) soene in deen zijde ende jan huene die geleyt was tot alle den/ goeden have ende erve wouters huene sijns brueders in dande(r) zijde aldair/ de voirscr(even) joncffrouwe marie en(de) hennen en(de) gheert hue(r) sone aenspraken/ den voirscr(even) janne huene bij hue(re)n voirsprake seggen(de) dat waer was/ dat wouter huene houdende was iii dachmael lants gelegen te roesbeke/ dair af sij meynden dat die selve niet dan een tochte(r) en was ende dat/ hij nochtan comen was inden hoff dair tvoirscr(even) goet hoefde en(de) hadt/ selve goet opgehouden als een erfman ende dat der banc recht es/ dair de goede liggen soe wanneer dat een tochte(r) e(n)nige goede opgehouden/ hadde ende en werde dat ophouden niet gestoert met rechte bynnen/ jaers dat hij dan alsulke goede erffelic behouden soude dwelc zij boeden/ te thoenen baden dair o(m)me ende versochten datmen den voirs(creven) janne huene/ in dien hadde dat hij dophouden vanden voirs(creven) goede af dade op dat hen/ dair bij aen hae(r) erfelich(eiden) gheen hinder en ghesciede met meer woerden/ die zij dair toe deden seggen weynich oft niet dienende tot hue(re)n rechte/ dair op de voirs(creven) jan huene met sinen voirsprake antworde seggende/ dat waer was dat joncffrouwe m(ar)griete wijlen hollants die wout(er)/ sijn brueder nae staet der heyliger kercken getrout hadde tvoirs(creven) lant/ wel gecocht ende gecregen hadde gelijc ene(n) scepen(en) brief van comptich die hij/ dede lesen clairleec in hielt ende begreep ende dat hij geleyt was met scepen(en)/ van loven(e) uut machte van ene(n) schoutbrieve die hij hadde al die wijle/ dat de voirs(creven) joncffrouwe margriete wijlen sijn wijf voirs(creven) leefde welken/ scoutbrief ende beleyt hij dede leesen int recht Seggende voert dat/ sijn wijf voirs(creven) woute(re)n sinen brueder tvoirs(creven) lant oic gemaect hadde/ sinen wille mede te doene maer dat liet hij gaen daert sculdich was/ te gaene doch dede hij dat opdoen o(m)me meer beschats wille/ hopende dat hij tvoirs(creven) ophouden dat wouter sijn brueder gedaen/ hadde vanden lande voirscr(even) niet sculdich en was af te doene maer/ dat hij in sinen beleide gehouden soude worden en(de) des genuecht hem/ wel manisse vanden meye(r) ende vonnisse der scepen(en) die scepen(en)
//
werden gemaent ende wijsden nae aensprake verantworden ende thoenisse/ dat alsulken aensprake als de voirscr(even) joncffrouwe marie en(de) hue(r) soene/ voirscr(even) ghedaen hadden den voirs(creven) janne gheen ontstade doen en sal/ noch hen scade cor(am) lomb(ar)t leym(in)gen abs(oloens) pynnoc vyncke septe(m)br(is) xxiiii