It(em) tvonnisse tusschen he(re)n clase sh(er)togen prieste(r) alse gelet tot den/ haeflike(n) goeden willems vander basdonc voir de bewise(n)nissen van/ vijf rijd(er)s lijftochten ten live des voirs(creven) he(re)n claes en(de) jeha(n)nen van/ wilre sijnre nichten in deen zijde en(de) vrancke(n) van dieve(n)/ die voir de so(m)me van xlix stuv(er)s die de voirs(creven) willem hem/ van hoppen en(de) cleyne(n) pe(n)neweerde(n) belanc was also hij seyde/ een deel vand(er) selve(r) have(n) gepant hadde in dande(re) es gewijst/ met dese(n) woirde(n) dat den voirs(creven) he(re)n clase en(de) sijne(n) beleide de/ voirs(creven) have volgen soude tsijnre schout behoef alsoe v(er)re als hij/ groetsste bij sijne(n) eede dat hij vande(n) voirs(creven) brieve vande(n) vijf/ rijd(er)s [lijftochten] ingebreke waire naden welken de voirs(creven) h(er) claes sijnen/ eedt dede als een priest(er) dat de voirs(creven) willem hem vander voirs(creven)/ lijftochte(n) metde(n) v(er)lope vanden xxii[ten] dach in octobri int jair xlv/ ingebreke en(de) onbetaelt wae(re) p(rese)nt(ibus) py(n)noc miles abs(oloens) witte willem(air)/ hortbeke febr(uarii) xvii