Tvonnisse tusschen janne lonijs die met scepen(en) brieven van loven(en)/ gegoedt en(de) gheerft is in alrehande goede tot berthem en(de) dair omtrent gelegen/ ende onder den ande(re)n in drie vierdel lants ghelegen achter de kercke van/ berthem tusschen roelove petersels ende janne lambrechts Item in een/ half dachmale lants gelegen aldair bijden bruesselschen wech tusschen/ de goede vand(er) banck en(de) robbrechts pichore Item in een half dachmale/ lants gelegen inde vors(creven) prochie bijde vierstrate tusschen de goede/ wouters van oesterhem en(de) der vruwen boens Item in drie vierdel/ lants gelegen bijde vors(creven) strate tusschen der selv(er) vruwen boens ende/ de vors(creven) strate Item in een dachmale lants gelegen opt selve velt/ tusschen de goede willems van berthe(m) ende corneelijs lambrechts Item/ in een vierdel lants gelegen opt velt geheten streke tusschen de/ goede(n) des vors(creven) jans lonijs ende symoens cobbere in deen sijde en(de) s(er)vaes/ uuten lyemi(n)ghen in dande(re) alse van dat de vors(creven) jan meynde want/ hij de vors(creven) goede metten rechte en(de) vonnisse verloren hadde ende/ de vors(creven) s(er)vaes hem van dien geloeft hadde genoech te doene/ alsoe hij behoirlijc de blijken dair tegen de vors(creven) s(er)vaes seyde/ alrehande reden(en) bijden welcken hij meynde van dien ongehoude(n)/ te wesen was gewijst met desen worden dat de vors(creven) s(er)vaes/ ghehouden soude sijn den vors(creven) janne te coelen en(de) te voldoen/ de vors(creven) geluften van genoech doen ende hadde hij vort yeman(ne)/ and(er)s te volghen dat hij dat doen mach en(de) metten rechte/ p(rese)ntib(us) lombart py(n)noc kersmake(re) vync augusti xxii/