Item alsoe als de eerweerdighe deken(en) en(de) cap(it)le van yncourt metten/ lantrecht hadde doen beslaen seke(r) bossche dair af thout lach gehouwen/ inde prochie van longeville gelegen ende toebehoe(re)nde roelande/ van bourgevaill voir thiende die de selve he(re)n vand(er) cap(it)len/ vanden selven bossche meynde te hebben Ende meester jan/ claes chirurgijn naeden rechte der stat van loven(en) beleyt/ sijnde totten goeden des voirs(creven) roelants met scepen(en) br(ieve) va(n)/ loven(en) de selve goede metter stat brieven hadde doen/ ontsetten ende de voirs(creven) he(re)n te loven(en) dach bescheiden/ dair de selve he(re)n quamen voir den raide vander stat in/ reden(en) en(de) wederreden(en) sunderlinghe van so(m)mege(n) p(ar)tien/ vanden selven bosschen bekinde he(n) de voirs(creven) meest(er)/ jan en(de) roelants hue(r) thiende te hebben en(de) van so(m)mege(n)/ niet alsoe dat dair op bijden he(re)n vanden raide geappointeert/ en(de) uutgesproken wert dat de voirs(creven) p(ar)tien trecken soud(en)/ opden gront der voirs(creven) goeden metten ouders op dat/ onderscheiden mochte worden aldair waerop den voirs(creven) stoet/ mochte rusten en(de) om te vertasten ofts p(ar)tien daer eens worde(n)/ mochten en(de) oft sijs niet eens geworden [en] consten dat dan p(ar)tien/ op heden weder o(m)me voir den raide comen souden om dair/ op getermineert te worden des recht soude wesen Totten/ welcken de voirs(creven) roelant hem als heden p(rese)nteerde en(de)/ de voirs(creven) he(re)n deden bij eene(n) van hue(re)n medebruede(re)n doen/ hue(r) ontschout dat sij niet geseint en wae(re)n vander/ voirs(creven) saken te compareren want he(m) oft e(n)nighen die op/ hue(r) daghe ter voirs(creven) vergaderinge quamen de voirs(creven) roelant/ quade q worde hadde gegeven dwelc ten versueke des/ voirs(creven) roelants en(de) ten bevele vand(er) stat geregistereert/ wert P(rese)ntib(us) burg(imagist)[ris] et plurib(us) aliis de (con)silio julii vii