Item hier na volcht tractaet geraempt tusscen her symoen py(n)noc ridder ende/ vrouwe katlijne van quaderebbe zijnre medegesellinne(n) in deen zijde en(de) amelrijck/ pynnoc brueder des voirs(creven) her symoens in dandere Inden yersten eest geraempt/ dat de voirs(creven) amelrijck bijde(n) voirs(creven) her symon zijne(n) brued(er) en(de) vrou katlijnen/ zijnre zwegerinne(n) behoirlijc gevesticht sal werden in allen den goeden die/ de selve gehuyssche van des voirs(creven) her symoens sijden en(de) van zijne(n) ouders v(er)storve(n)/ metter hant hebben hoedanich die zijn het zijn leene oft ande(re) inder manie(re)/ en(de) talsulken rechte ende laste als die liggen in forme(n) Te weten dat de/ voirs(creven) her symon ende de voirs(creven) vrou katlijne ende de lancxste leven(de) van hen/ beyden zijn tocht behouden sal in alle de goede die de voirs(creven) her symoen va(n)/ wegen vader ende moeder oft anderssins van zijnre oudere(n) wegen besittende/ es ende voirs(creven) zijn ende vanden goeden die hem bleven zijn van jouffr(ouwen) lijsbetten/ van boechout zijnre moyen die de voirs(creven) amelrijc ter stont met deser voerwerden/ sal moegen aenveerden Daer op ende aen selen de voirs(creven) her symoen en(de) zijn/ huysvrouwe en(de) de lancxste leven(de) van hen beyden behouden jairlicx tot hue(re)n ende/ ten lancxste(n) van huerre beyder live hondert ende dertich hollan(tsche) guld(en) tsjaers/ oft de werde daer af vallende [jaerlijx] deen helicht tsint jansmisse baptisten en(de) onbegrepen/ te bamisse dair na volgen(de) ende dander helicht te kersmisse ende te paesschen dair/ na onbegrepen volbetaelt te zijne dierste betalinge inne te gane tsint jansmisse/ naestcomen(de) Van welken hondert en(de) xxx hollan(tsche) guld(en) voirs(creven) de voirs(creven) amelrijc/ den voirs(creven) gehuysschen alsulken vesticheit doen sal dat zij daer met wael selen/ wesen verwaert ende daer af goeden toepant oft redelijke borchtocht setten/ dat hen ende de lancxsten levende van hen vast ende zeker sal moegen zijn/ ende selen alle de vesticheiden [voirs(creven)] geschien ten coste ende laste des voirs(creven) amelrijcx/ Ende es ondersproken dat in deser guedingen oft vesticheit die den voirs(creven) amelr(icken)/ alsus soude werden gedaen niet begrepen zijn en selen de goede hier na/ verclaert Te weten den beemt gelegen in loevenen(er)beempde die gene die daer/ inne gevesticht zijn en selen dier vesticheit voert na den rechte moegen gebruycke(n)/ de goede die de voirs(creven) her symoen in zijne(n) vollen stoele gecregen heeft noch/ oic dat desen niet jegenstaende de voirs(creven) her symoen behouden sal zijnen/ vryen wille om van xxv hollan(tsche) guld(en) tsjaers uut oft op alle(n) den voirs(creven) goeden/ van zijne(n) vader ende moeder comen(de) na zijn doot te disponere(n) te zijne(n) wille/ daert hem gelieve(n) sal Vanden welken oft hij zijn [gheen] disposicie maecte noch/ bynne(n) zijne(n) leven(en) en vercleerde de voirs(creven) amelrijc ongelast soude blive(n) Met
//
condicie(n) nochtan oft gebuerde dat de voirs(creven) her symoen wettige gebuerte hier/ namaels gecrege dat dan dese vorwerde te nyeute ende van gheenre werde(n)/ zijn en sal Oft waert oic dat de selve her symon openbair noetsake hadde/ van live oft goede dat hij oec soe vele sal moegen vercoopen van desen goeden/ van zijne(n) vader en(de) moeder gecomen des voirs(creven) es niet wederstaen(de) dat hij hem/ daer mede lossen moeghe Bij also dat hij te zijne [dier] laste van sijns voirs(creven) wijfs/ goede(n) oec soe vele vercoopen sal moete(n) na advenant huerre beyder goede Oec/ eest voerwerde dat de voirs(creven) amelrijck in dese goede sal werden gegoedt in/ sulker vuegen dat hij die noch versetten noch vercopen en sal moegen maer/ datse zijne(n) wettigen kinde(re)n na zijn doot selen moeten blive(n) het en wae(re) dat/ hij e(n)nige van dien he(m) ongerieflijc oft scadelijc liggen(de) woude vercoopen dat/ hij dat sal moegen doen Op also dat de pe(n)ni(n)ge daer af comen(de) weder aen ande(re)/ goede ter selver natueren ten profijte van zijne(n) kinde(re)n na des voirs(creven) amelrijcx doot/ selen worden geleecht Voert heeft de voirs(creven) amelrijck gelooft den voirs(creven) zijnen/ brueder ende suster oft gebuerde dat zij last hadden van heergeweeden uut/ ocsuyne vanden ontfange dat zij te hove gedaen hebben vanden derdendeele/ van hondert guld(en) opde goede vander horst allen dien last sal de voirs(creven)/ amelrijc den voirs(creven) her symoen(e) ende vrouwe katlijnen afdoen ende hen/ scadeloes ontheffen Es voirt verclaert dat de voirs(creven) amelrijck de goede/ van wegen der voirs(creven) jouffr(ouwen) lijsbetten van boechout gecome(n) het zij wouwe(re)n/ oft moelen(en) ter stont aenverden sal Behoudelijc wes de pechte(re)n vande(n)/ selve(n) wouwe(re)n sculdich zijn den voirs(creven) gehuysschen ten termijne van/ bamisse naestcomen(de) vanden visschen diese gevischt hebben Ende soe wes/ de selve her symoen ende zijn huysvrouwe om de wate(re)n te spisen ten/ aenveerden vanden selven wateren den huerlingen geleent hebben den/ selven gehuysschen volgen sal ende wes vande(n) moelen(en) verschenen/ es zeder der doot vander jouffr(ouwe) van boechout dat dat den/ voirs(creven) amelrijcke sal volgen des sal hij gelden de refectie die/ zeder der selver tijt daer aen geleecht es ende wes van houte/ opde voirs(creven) goede gehouwen zijnde opden dach deser composicien/ opde voirs(creven) goede gehouden zijn het zij van celleblocke oft overhoute/ daer af sal volgen den selve(n) amelrijcke tot der selver refectien/ behoef die celleblocke ende doverhout den voirs(creven) he(re)n symoene/ ende vrouwe katlijnen Dit geschiede xxvii dage in april/ int jaer van liii Cor(am) ty(m)ple velpe scab(inis) lov(aniensibus)/