SAL7346, Act: V°29.3-R°30.1 (52 of 677)
Search Act
previous | next
Act V°29.3-R°30.1  
Act
Date: 1452-07-26

Transcription

2019-08-19 by kristiaan magnus
It(em) inde sake die te gescille stont voe(r) den raide vand(er)/
stad tussche(n) gheerde cuerinx in deen zijde en(de) janne va(n)/
hansbeke in dande(r) alse vand(en) driehond(er)t gulden(en) clinckarde(n)/
die de he(r) va(n) p(er)weys den voirs(creven) gheerde sculdich was en(de)/
die de voirs(creven) gheert de(n) voirs(creven) janne va(n) hansbeke voir m(ijn) he(re)n/
cancell(ie)r en(de) raide ons gened(ichs) he(re)n ov(er)gegeve(n) hadde dair af/
de selve hansbeke deen hondert hadde gehave(n) Soe es op hede(n)/
bijden raide vander stad geappointeert eens deels bij ov(er)geve(n)/
va(n) p(ar)tien des h(ier) nae volght Te weten dat de voirs(creven) jan/
va(n) hansbeke tussche(n) dit en(de) ons(er) vrouwe(n) dach nativitas/
naestcomen(de) soe bij hem selve(n) soe bij sijne(n) sweer dien hij de/
voirs(creven) so(m)me van ii[c] clinckarde(n) noch gebrekende hadde ov(er)gegeve(n)/
meynende dat hijt va(n)t soude v(er)volge(n) als hij seide oft bij ande(re)n de/
selve so(m)me met rechte navolgende den vo(n)nisse der scepen(en) va(n)/
loven(en) v(er)volge(n) sal om dien vande(n) selve(n) he(r) va(n) p(er)weys die die/
sculdich es te werde(n) betaelt op dat zij dan voirt met malcand(ere)n/
moege(n) rekene(n) en(de) oft gheerde rest gebuerde nae goede rekeni(n)ge/
als hij meyndt dat sal Dair af hansbeke hult de contrarie/
dat hem dat werde(n) moege en(de) op dat de selve gheerdt die/
/ nu den voirs(creven) hansbeke voe(r) sijn actie die hij te hemwert meyndt/
te hebbe(n) inde vroente heeft des zijns te bynne(n) zijn moege soe/
heeft geloeft de selve hansbeke t(er) selv(er) voirs(creven) feeste(n) va(n) onser/
vrouwe(n) den voirs(creven) gheerde va(n) sijne(n) gebreke naeder voir[ge]schiedenisse(n)/
inder sake(n) te conte(n)te(re)n oft weder inder vroente(n) te come(n) dair hij/
nu es ende niet dair uut te scheide(n) voir hij mette(n) selve(n) gheerde/
mett(er) minne(n) oft mette(n) rechte beslicht sal wese(n) Ende voe(r) den/
selve(n) hansbeke alsdan inder vroente(n) te leve(re)n oft gheert niet geco(n)te(n)t(er)t [en] zij/
ghelijc hij heeft geloeft te come(n) Zijn borge(n) bleve(n) des selfs hansbeecx/
jud(ocus) reyne(re) de heelt va(n) mechele(n) en(de) wout(er) van laethem et duo/
p(ri)mi insup(er) p(ri)m(us) ov(er) de uutsprake wae(re)n opp(endorp) substitut(us) wynge/
burgim(a)g(ist)ri(s) et alii de consilio en(de) ov(er) de borchtocht wae(re)n scepen(en)/
lud(ovicus) roel(ofs) velpe en(de) gesciede de uutsprake xxvi julii en(de) de borchtocht/
des and(ere)n daighs nae
ContributorsKarel Embrechts
Moderated byKarel Embrechts
Last update: 2015-03-17 by Jos Jonckheer