Item jan van schoenenberghe en(de) henric van schoenenberghe sijn sone p(r)ius/ emancipat[(us)] gelaesmakers hebben verdinct te maken [tegen de kercmeest(er)s van s(int) quinte(n)] wel en(de) loflijc van/ goeden costbaren ghelasen eene gelasen vynste(r) cleyn van ruyten ende/ wael geloet int nu werc van sinte quintens te loven(en) staende alsoe/ groet als die aldair nu gemetst staet elcken voet dair af vanden/ slechten wercke o(m)me en(de) voe(r) twee stuv(er)s en(de) tvol tdobbelwerc o(m)me/ en(de) voe(r) vier stuv(er)s den voet te betalen alst tvoirs(creven) werc volmaect sal/ zijn alse vervolghde schout Welcke gelasen vynstere de vorscr(even)/ vader en(de) sijn sone geloeft hebben een jaer lanc nae datse volmaect/ sal zijn te houden staende op hue(re)n cost het en wae(r) datse met/ ov(er)tuldighen weder brake en(de) hebben [oic] gekint gehaven te hebben thien/ guld(en) peters eens te xviii st(uvers) tstuc op tvoirs(creven) werc Vort is/ vorweerde dat de vors(creven) vader en(de) moeder [sijn sone] telken hondert voete/ aende vors(creven) ii stuv(er)s voe(r) den voet afcortten sullen d(er) vors(creven) kercken/ driendertich stuv(er)s cor(am) roelants witte sept(embris) quarta