Tvo(n)nisse vanden gedinghe dat voe(r) meye(r) en(de) scepen(en) van loven(en)/ geweest es tusschen katlijnen dibbouts die te desen tot eenen/ borge stelde henricke van bierbeke in deen zijde en(de) romboute/ van arschot die geleit es totten goeden katlijnen hers dochter/ henricx wilens hers in dande(r) aldaer de vors(creven) katlijne boet te/ thoenen metten scepen(en) die over dbeleit hadden geweest/ en(de) dat overbracht dat de selve katlijne ten tijde als tselve/ beleit was gedaen niet sculdich [mechtich] en was der goede daert/ op geschiede ende seyde vort bij ar alrehande reden(en) dat/ dair o(m)me en(de) om sekere handelinghe die hier af voermaels/ bijder stat geweest was en(de) oic mits dat de vors(creven) katlijne/ hue(re)r synnen qualic te vele scouden mechtich was tselve/ beleit van gheend(er) weerden zijn en soude Vanden welcken/ de vors(creven) geleide hielt de (con)trarie hoopen(de) dat hem noch/ sijnen scepen(en) brieven al dat nad(er) stat recht gheen ontstade/ sculdich en was te doene wert gewijst bijden he(re)n scepen(en)/ van loven(en) ter manissen smeyers datmen den vors(creven) romboute/ houden soude in sijnen beleide en(de) hadde de vors(creven) katlijne/ in desen van e(n)niger termijnacie(n) yet te volghen dat zij/ dat daden voe(r) den raide vand(er) stat p(rese)ntib(us) jasp(ar) abs(oloens) witte/ vync m(er)sberghe maii iiii[ta]