Item uut dien dat goffart le charpentir int recht voe(r) meye(r) en(de) scepen(en)/ van loven(en) v(er)reict hadde rase van crenwic voe(r) hond(er)t peters/ uut clachten die hij op hem hadde gedaen en(de) de vors(creven) raes gemeynt/ heeft inden vors(creven) goffarde niet gehouden te zijne versuekende/ dat de selve goffart navolgen(de) den statuten vand(er) stat zijn gebrec/ v(er)cle(re)n souden soe zijn beyde de vors(creven) p(ar)tien op heden voe(r) den/ raide vand(er) stat gecompareert Aldair de vors(creven) goffart v(er)claerde/ sijn gebreke bij gescrifte en(de) oic bij monde als dat de vors(creven)/ raes in hem gehouden soude zijn van corweyen pijnen en(de)/ arbeyde stroe meste en(de) anders dair aff de so(m)me gedroeghe/ boven de vors(creven) c peters p(rese)nte(re)nde des zijne(n) eedt Dair tege(n)/ de vors(creven) raes v(er)antweerden(de) zeide dat hij en(de) de vors(creven) goffart/ van alle den gebreken vors(creven) verlijct wae(re)n ter p(rese)ncien van/ goeden mannen also dat zij malcande(re)n van allen saken hadden/ quijtgeschouwe(n) Ende dat de vors(creven) goffart hem seder dien/ tijde negheenen arbeit noch anders aen hem v(er)diendt en hadde/ Ende alse de vors(creven) goffar tvoirs(creven) verliken bekinde en(de) desgelix oic/ dat hij zeder dien tijt aenden vors(creven) rase niet v(er)dient noch/ uutstaende en hadde maer seyde dat hij sijn vors(creven) gebrec/ inden yersten tractate vors(creven) vergheten en(de) achtergelaten hadde/ heeft de voirs(creven) raet vand(er) stat uut(er)lic getermineert dat/ tvors(creven) v(er)reyken te nyeute en(de) van onweerden en(de) de vors(creven) raes/ dair af ongehouden zal bliven actu(m) in pleno (con)silio no(vembris) xxix