Cont zij allen lieden dat jan van meerbeke woenen(de) te meerbeke/ in yegenwordicheiden der scepen(en) van loven(en) gestaen heeft genomen/ en(de) bekint dat hij genomen heeft tegen vruwe gertrut uuten/ lyemi(n)gen vruwe bijd(er) gracie(n) gods en(de) conventuale des godshuys vand(er)/ banc bij loven(en) met consente en(de) wille der momboren des selfs/ thof des vors(creven) godshuys gelegen inden dorpe van meerbeke mette(n)/ huysen hoven wynnen(de) lande beempden eeuselen en(de) allen ande(re)n zijne(n)/ toebehoerten Te houden te hebben en(de) te wynnen van half merte/ dat was int jaer xiiii[c] eenen(de)vijftich na costume van scriven/ des hofs van cameric eenen termijn van twelf jae(re)n lanc due(re)nde/ deen na dande(r) sonder middel volgende elx jaers dae(re)nbynnen/ de vors(creven) wynnen(de) lande o(m)me en(de) voe(r) vivenveertich mudden en(de)/ sesse halste(re)n rox goet en(de) payabel met wanne en(de) vede(re)n wael/ bereidt der maten van loven(en) Te weten alsulke coren en(de) grain als/ jaerlix opde vors(creven) lande wassen zal tsint andriesmesse apostels te/ betalen en(de) int vors(creven) godshuys oft int godshuys herberge te loven(en) te/ leve(re)n der vors(creven) vruwen oft hue(re)n geco(m)mitteerden rentmeester den/ vors(creven) t(er)mijn due(re)nde en(de) telken termijne als vervolghde schout Ende/ de beempden en(de) eeuselen o(m)me en(de) vore achte grypen te xl pl(a)c(ken) tstuc/ jaerlix ts(in)te mertens messe inden winter te betalen als voe(r) en(de) telke(n)/ termijne als verreicte schout Item sal de vors(creven) wynne alle de vors(creven)/ lande den vors(creven) t(er)mijn due(re)nde wel en(de) loflic wynnen en(de) werven/ gelijc sijnen reengenoten bove(n) en(de) beneden en(de) allet stroe ende/ voesteringhe dat vanden vors(creven) goeden comen zal sal de vors(creven) wy(n)ne/ int vors(creven) hof bringen en(de) aldair etten en(de) sliten met sijnen beesten en(de)/ te meste maken en(de) dat mest vue(re)n opde vors(creven) lande ten behoerlike(n)/ tijde also wel op tverste als op dneste dnaeste lant en(de) dslants meeste(n)/ p(ro)ffite Item es vorweerde so wanneer datmen int vors(creven) hof aende/ huyse ty(m)mert metst dect oft plect dat dan de wynne vors(creven)/ den wercluden den montcost geven sal en(de) de vors(creven) vruwe de dachue(re)n/ betalen en(de) alsmen daer werct sal de vors(creven) wynne d(aer) eenen/ knape leve(re)n voer [om] de wercluden te hulpen Item sal de vors(creven) wynne/ jaerlix leve(re)n lxxx mandelen goeder cosbaer walme(re)n om de huysinge/ vanden vors(creven) hove mede te decken en(de) desgelix de dacroeden ende/ teene diemen alsdan aende huysingen behoeve(n) sal Item sal de/ vors(creven) wynne de vors(creven) beemde wel en(de) loflic graven en(de) royelen ryoole(n)
//
ende beken vegen als sijs te doene zullen hebben op zijnen cost ende die/ ten eynde vanden vors(creven) termijne wel ende loflic gegraven ende/ geryoelt laten Item sal de vors(creven) wynne alle jae(re) setten opde vors(creven)/ goede setten vijftich goeder levender willegen en(de) alboomen pooten/ bynnen tijts alst behoeft behoert ten meesten orber en(de) proffijt/ des vors(creven) godshuys Item sal de vors(creven) wynne de herstraten en(de)/ ande(re)n straten oft weghe tegen de vors(creven) goede liggende vermaken en(de)/ houden wel en(de) loflic sond(er) mind(er) vruwen cost Item zal de vors(creven)/ wynne alle verdroeghde willegen oft ande(re) boome die niet te/ verty(m)meren en doghen mogen afhouwen vanden vors(creven) goeden en(de)/ voer elcke twee leven(de) pooten setten vanden selven aerde Item/ sal de vors(creven) wynne alle leem savel steene oft ty(m)merhout dair/ omtrent halen dat men aldair tot e(n)nigen wercke aende/ huysinge vors(creven) behoeven sal Item zal de vors(creven) wynne alle/ den chijs en(de) pacht uuten vors(creven) goeden gaende betalen ten tijde/ alsmen dat sculdich es te betalen uutgescheiden een mudde/ rox der zielmessen sond(er) afcortten van sijnen vors(creven) pachte oft/ weyde gelde Item sal de vors(creven) wy(n)ne jaerlix leve(ren) den/ vors(creven) termijn due(re)nde op des vors(creven) godshuys wijngarde een/ duysent goeder wijngartstaken Item en sal de vors(creven) wy(n)ne/ bynnen den lesten drie jae(re)n gheen lat mogen hoervruchten/ Item waert also dat god verhueden moet dat aende/ vors(creven) goede e(n)ige scade geschiede van tempeesten oft gemeyne(n)/ orlooghe oft hervaert dair af soude de vors(creven) vruwe van des/ vors(creven) godshuys wegen den wynne restoir doen gelijc ande(re)n he(re)n/ en(de) p(re)laten hue(re)n pechtene(re)n doen sullen boven en(de) beneden Item sal/ de vors(creven) wynne ten eynde van sijnen vors(creven) t(er)mijne alle de vors(creven)/ lande laten gelijc hijse vant te sijnen aencomen Te weten xvi/ boender een vierdel myn met terwen [rogge] besaeyt en(de) een boender/ met terwen besaeyt op vier getidege voe(re)n wel in tijts Item/ xvi boend(er) ii(½) dachmale stortten eens omgedaen Item xii boend(er)/ ii(½) dachmale braken die sal hij geheel laten Item sal de vors(creven)/

wynne de vors(creven) lande houden en(de) hoeden van grebben en(de) oft Item/ want de vors(creven) wynne alle de vors(creven) lande te weten(e) die lande die/ gecregen wae(re)n tegen zeke(re) p(er)sone van haeght en(de) ande(re) en(de) oic/ dlant dat gecregen was tegen henricke coemans niet en
//
vant gewonnen gelijc dande(r) lande dair inne leeght soe heeft/ geloeft de vors(creven) wy(n)ne die te laten tsijnen afscheiden gelijc dande(r) lande/ nade aerde dairt inne leeght ende des soe heeft hen de vors(creven) vruwe/ gegeven xviii mudden corens eens Item sal de vors(creven) wy(n)ne de/ vors(creven) lande hoeden en(de) houden van grebben en(de) oft dair e(n)nige inne/ sijn of quamen in toecomen(de) tijden die zal de vors(creven) wy(n)ne slichten/ en(de) maken datter die ploegh ov(er)gaen zal also v(er)re alstment gedoen/ can zijnen vors(creven) t(er)mijn due(re)nde Item es vorweerde gevielt soe/ dat god verhueden moet dat e(n)nige scade van brande aende/ huysinghe vanden vors(creven) hove quame bynnen den vors(creven) t(er)mijne/ en(de) dat van des vors(creven) wynnen wegen toequame dair voer/ sal de vors(creven) wynnen der vors(creven) vruwen en(de) godshuyse gheven/ en(de) betalen hondert lichter guld(en) te x stuvers tstuc oft/ een ande(r) huys doen maken also groet en(de) goedt alst voe(r)/ was Item sal de vors(creven) wynne met sijnen huysgesynne de/ vors(creven) huysinghe den vors(creven) zijnen termijn due(re)nde bewoenen/ uutgescheiden dyerste jaer mach hij eenen ande(re)n in die/ woeninge doen woenen Item is ond(er)sproken dat de vorscr(even)/ p(ar)tien ten leste jae(re) als sij scheiden sullen een half jae(r) te voe(re)n/ malcande(re)n zeggen sullen te dien eynde dat hem een/ yegelic dair af na sal mogen weten te richten Item/ heeft noch de vors(creven) jan van meerbeke wynne genome(n)/ tegen der vors(creven) vruwen en(de) (con)vente met (con)sente als voe(r)/ de groete thiende inden dorpe van berchzem gelijc en(de)/ in alle der manie(re)n tvors(creven) godshuys die aldair jaerlix/ heeft elx jae(r)s o(m)me en(de) voe(r) thien mudde rox en(de)/ thien mudden gersten al goet en(de) payabel met wanne en(de)/ vede(re)n wael bereit der maten va(n) loven(en) ts(inte) andries/ messe apostels te betalen ind(er) manie(re)n als voe(r) den vors(creven)/ t(er)mijn due(re)nde quolib(et) ass(ecutu)[m] It(em) sal de vors(creven) wy(n)ne de vors(creven) thiende/ vue(re)n int hof vors(creven) en(de) die voesteringhe aldair etten en(de)/ sliten sond(er) e(n)nich stroe dair uut te vue(re)n oft te late(n) vue(re)n in/ e(n)niger manie(re)n En(de) alle dese vorweerde(n) (et)c(etera) abs(oloens) opp(endorp) no(vembris) xxi