Item also voir den raide vander stat comen zijn gheert van herwijn/ en(de) sander van oerbeke met meer ande(re)n hue(re)n medeplichte(re)n die/ met scepen(en) brieven van loven(en) van he(re)n rase de rijke priester/ gegoedt en(de) gheerft zijn in alle de goede en(de) renten jans/ wilen de roeve(re) des jongen in deen zijde her augustijn vande(n)/ borchoven ridde(r) jan de pape augustijn van dormale tielman/ van tsestich en(de) meer andere insdeels geleit en(de) insdeels totten/ goeden des selfs wilen jans de roeve(re) en(de) insdeels ongeleit/ en(de) gebrec hebbende van zeke(re)n renten en(de) sculden dair inne/ dat de selve jan de roeve(re) aen hen v(er)bonden stont in dande(re)/ Alse vanden selven goeden die de vors(creven) gheert en(de) zijn/ medeplichte(re)n meynde(n) te trecken en(de) den vors(creven) ande(re)n sculde(re)n/ voirtegane uut crachte vander vors(creven) guedingen en(de) oic eender/ termijnacien die also zij seyden hen diene(n) soude geregistereert/ staende op den xxiiii dach van januario int boec xiiii[c] twee/ en(de) vijftich Dair tegen de vors(creven) her augustijn en(de) zijn/ medep(ar)tien onder den ande(re)n opdeden dat hen bijden burg(er)meest(ere)n/ en(de) wethoude(re)n vand(er) stat te weten jasp(ar) absoloen en(de) henricke/ van lynte(r) en(de) ande(re)n vanden vollen raide die wae(re)n int/ jair xiiii[c] li toegeseeght wae(re)n dat zij om de costen te/ schouden hen metten vors(creven) beleide(n) te doene op jans roev(er)s/ goede niet en vorderden ende want zij gemeynlic voir/ hue(r) gebrec metten vors(creven) gheerde en(de) sijnen medeplichte(re)n/ ghevolght hadden te geliken laste dat zij dair om gelijc/ proffijt en(de) onp(ro)ffijt souden hebben Alsoe zij dat oppembairlic/ hebben gethoent soe es ov(er)dragen en(de) get(er)mijneert op/ heden inden vollen raide rypelic aengesien de gelegenth(eit)/ vand(en) vors(creven) guedingen t(er)minacie(n) en(de) toeseggen en(de) anders/ des elc vand(en) vors(creven) p(ar)tien heeft willen seggen en(de) op doen/ dat de vors(creven) guedinge den vors(creven) he(re)n augustijne(n) noch/ ande(re)n gebrec hebben(de) uutstaende met scepen(en) brieve(n) va(n)/ loven(en) aenden vors(creven) janne de roeve(re) gheen prejudijs/ dragen en sal mair dat zij dair af gelijc t(er) ordinancie(n)/ vand(er) stat als van hue(re)n principalen gebreken staen/ sullen en(de) hebben des de stat dair inne ov(er)dragen zal/ En(de) oft hier inne e(n)nich letsel oft gebrec oft donckerheit/ geviele dair af hult de rait vand(er) stat dese t(er)mijnacie/ altijt stat grijpen(de) de int(er)pretacie en(de) tvercleren te huerweert Actu(m)/ in pleno (con)silio junii xiii