Het zijn comen in rechte voir meye(r) en(de) scepen(en) van loven(en) jan van/ utricht in deen zijde en(de) henric van hasselt geheten de ketelbuetere/ in dande(re) Alse van zeke(re)n scepen(en) brieve(n) van loven(en) van tractate vortijts/ te twee stonden gemaect en(de) voir scepen(en) van loven(en) gepasseert tusschen/ den vors(creven) janne ter eend(er) zijden en(de) den vors(creven) henr(icken) [met e(n)nige(n) sijne(n) medeplichte(re)n] ter ande(re) die/

de vors(creven) jan va(n) utricht gevo(n)nist hadde spreken(de) vand(en) omberuerliken/ goeden gebleven nade doot claus wilen van utricht vader des vors(creven)/ jans en(de) oudevader des vors(creven) henricx die de vors(creven) jan van utricht gevo(n)nist/ hadde Ende uut crachte vanden welcken hij den selven henr(icken) mits/ brieven vander stat aenden meye(r) van caggevenne gescreven dair/ onder de vors(creven) ketelbuete(re) dagelix wandelde en(de) sijn goede liggen(de) hadde/ innegescreven zijnde aensprack Seggend(de) dat de selve tractate onder/ dande(re) inhielden dat hem de vors(creven) henric en(de) sijn medeplichte(re)n he(m) als/ besitte(re) vanden grond der vors(creven) goede overleve(re)n zoude alle de brieve
//
die zij hadden oft wisten den vors(creven) goeden aengaende Ende zunderlinghe/ de brieve van vijf schilsche guld(en) opde vors(creven) goede voermaels besedt en(de)/ veronderpant die de vors(creven) ketelbuete(re) onder hebben zoude die welke/ voermaels toetebehoe(re)n plaghen meester wille(m)me van steyvorde(n)/ Ende dat de vors(creven) henric die brieve alsoe hadde en(de) bij hem gethoent/ wae(re)n geweest inde banc van caggeve(n)ne en(de) voir scepen(en) aldair En(de)/ dat der scepen(en) va(n) caggeve(n)ne scepen(en) brieve wae(re)n op dese goede spreken(de)/ dat boet de vors(creven) jan te thoenen Hopen(de) nade geloofte en(de) eede vand(en)/ brieve d(er) vors(creven) goede inde vors(creven) tractate begrepen staende en(de) na dat hij/ de vors(creven) goede ae(n) he(m) geheelijc gelost hadde en(de) dair voir een groete zo(m)me/ van pe(n)ningen gegeven also oic de vors(creven) tractate uutwijsen dat hem de vors(creven)/ henric de vors(creven) brieve ov(er)leggen zoude en(de) sculdich wae(re) ov(er)teleggen hem/ des gedragen(de) totten rechte Op dwelc de vors(creven) henric hem v(er)antweerden(de)/ hoepte d(er) vors(creven) aensp(ra)ken ongehouden te wezen Bij dien dat hij de vors(creven) vijff/ schilsche guld(en) tot behoef va(n) zijne(n) kynde(re)n gecrege(n) hadde en(de) na dien tijt dat de/ vorweerde en(de) (con)dicie(n) vand(er) vors(creven) lossingen yerst begrepe(n) was en(de) gemaect en(de)/ dat oic te dier tijt de vors(creven) rente(n) en(de) de brieve d(aer) af stonde(n) in handen des vors(creven)/ meest(er) willems va(n) steyvorde dat boet hij te thoene(n) En(de) bij dien en(de) meer ande(re)n/ reden(en) bij hem ingeleeght zunderlinge na eene(n) zeke(re)n vo(n)nisse hier af voir hem/ en(de) tegen den vors(creven) ja(n)ne voirmaels gewijst geregistereert staen(de) ond(er) ons febr(uarii)/ xii a(nn)[o] lvii hoepte hij ter aensp(ra)ken ongehouden te wezen en(de) dat hij zijn recht dat/ hij vanden vors(creven) goeden begonne(n) hadde inden hof en(de) in de banc te caggeve(n)ne/ voir de vors(creven) rente te volghen vortvolgen zoude Des getroest hij hem totte(n)/ rechte en(de) de vors(creven) jan hoepte de (con)trarie En(de) soe wert gewijst ten uut(er)ste(n)/ bijden he(re)n scepen(en) va(n) loven(en) ter manissen smeyers na aensprake v(er)ant/ weerden en(de) thoenisse van beyden p(ar)tien hier op v(er)hoert dat de/ vors(creven) henric de ketelbuete(re) zijn recht vanden vors(creven) vijf schiltsche/ gulden(en) vortvolgen zoude inde banc dair hijt begonnen hadde/ niet wederstaende der vors(creven) aenspraken P(rese)ntib(us) omnib(us) scab(inis)/ dempto lyemi(n)gen dec(embris) v