Vanden gedinghe dat gheweest is inde banc voir meye(r) en(de) scepen(en)/ van loven(en) tusschen mychiele van breetzijp als geleit tot allen/ den goeden have en(de) erve gielijs van let voir een so(m)me va(n) x/ pet(er)s eens in deen zijde en(de) henricke van schoenenberghe gelaesmake(r)/ zwager des vors(creven) gielis in dande(re) Dair de vors(creven) mychiel seide/ dat lodewijc wilen van let naest i na staet der heyliger kercken getruwet/ hadde eend(er) geheten m(ar)grieten wilen coecbeckers en(de) dat zij tsame(n)/ hadden drie kynde(re) in gheheelen stoele te weten den vors(creven) gielise lode/ wike en(de) katlijnen die wettich wijf es des vors(creven) henricx de welcke wilen/ gehuyssche tsamen besaten zeke(re) erflike goede te weten huys en(de) hof mett(er)/ toebehoerten gelegen inde hoolstrate dair af de questie is tusschen den/ goeden henrix wellens en(de) machtelt wellens dair uut de vors(creven) wilen/ lodewijc gestorven was als uut sijnen prope(re)n erve en(de) de vors(creven) m(ar)gr(iete)/ bleef inne sitten(de) als een tochtersse en(de) d(air) vorts uut sterf als uut/ hue(re)r tocht Dede vort seggen de vors(creven) mychiel dat de vors(creven) gielis/ geleeft heeft nade de doot van zijnen vad(er) en(de) moed(er) vors(creven) hoopen(de)/wair hij welcke pointen vors(creven) de hij p(rese)nteerde te thoenen en(de) metten my(n)ste(n)/(et)c(etera) hopen(de) wair hij die gethoenen conste dat hem en(de) zijnen beleide tskyns/ gedeelte des vors(creven) gielis volgen soude p(rese)nterende tot zijnen scepen(en)/ brieven ofts hem behoefde zijnen eedt hoe vele hem de vors(creven) gielis/ vanden vors(creven) x peters van goed(er) en(de) dueghdeliker schout al noch/ sculdich en(de) belanc wae(re) Dair op de vors(creven) henric hem verantwerden(de)/ kynnen(de) dat zijn wijf vors(creven) wettich dochter was des vors(creven) wilen lod(ewijc) en(de)/ m(ar)gr(iete) sijns wijfs seggen(de) [mair hoopte] dat hij ny(m)mermeer thoenen en soude dat/ de vors(creven) gielis livich en(de) leven(de) is geweest na zijnd(er) vors(creven) moed(er)/ wair opde vors(creven) mychiel met vo(n)nisse gewijst was tot sijnen/ bethoene Ende ten daghe van thoenen dair toe gestelt thoende de/ voirss(creven) mychiel met clause gheens geheten stas dat hij den vorscr(even)/ gielise gesien heeft livich en(de) levende des tsint jansmesse/ lestleden was een jair en(de) met vrancken meys dat hijten oic/ gesien hadde des nu was te vastenavonde ii jair Item met pete(re)n
//
van maerbeke den jonge dat hijten sach te tustane omtrent viii dage oft xiiii/ nacht na sint jansmesse lestleden Item met janne va(n) voshem dat hijten/ sach te monteflesscoen? des te paesschen ii jair sijn sal Thoende vort/ met vii wettighe manne(n) dat de vors(creven) lod(ewijc) over xiii jair en(de) de/ vors(creven) m(ar)gr(iete) zijn wijf des sinte mertensmesse lestleden was twe jair/ oft dair omtrent van live t(er) doot quam Item hij thoende metten/ p(ro)chiaen van sinte mych(iels) te lov(en) dat de vors(creven) m(ar)gr(iete) aflivich is geweest va(n)/ des sinte m(er)tensmesse was ii jair Item thoende vort met vi wettighe/ p(er)sone dat de vors(creven) lod(ewijc) gestorve(n) is [uuten vors(creven) goeden] als uut zijne(n) wettigen erve/ en(de) dat de vors(creven) m(ar)gr(iete) zijn wijf dat bleef besitten(en) als een tochtersse en(de)/ d(air) uut sterff als uut(er) huer(er) tocht en(de) dat de vors(creven) henric de vors(creven) ka(tlij)[ne]/ des vors(creven) wilen lod(ewijc) dochter vors(creven) getruwet heeft na staet d(er) heylig(er)/ kercken Was gewijst bij vo(n)nissen d(er) scepen(en) van loven(en) ter manissen/ smeyers na aensp(ra)ke verantwerden van beide de(n) vors(creven) p(ar)tien en(de) thoenesse/ des vors(creven) mych(iel) dat de vors(creven) mychiel op zijn p(rese)ntacie vors(creven) met/ zijnen scepen(en) br(ieven) op tskinsgedeelte des vors(creven) gielis v(er)halen sal sijn/ wettich gebrec p(rese)ntib(us) lyemi(n)ge(n) witte roel(ofs) ouder(ogghe) m(ar)cii ultima