Het zijn comen te rechte inde banc voir meye(r) en(de) scepen(en)/ van loven(en) jan mychiels ty(m)merman ter eender zijden ende/ jouffruwe marie gielis weduwe bertelmeeus wilen hont/ die nu wijf is jacops vanden poele met janne de hont hue(re)n/ sone ter ande(re) aldair de vors(creven) jan dede segghen dat hij and(er)/ wile ten erfpachte teghen den vors(creven) p(er)sonen genome(n) hadde/ de molen metter toebehoerten geheten eveloecx molen/ gelegen opde werft buyten der porten gaende ten beghijn/ hove weert jairlix om xxix mudden corens d(er) maten va(n)/ loven(en) erflic ter quitingen dmudde met xviii rijd(er)s sond(er)/ meer co(m)mers vanden selven goeden te gheven Seide vort/ dat vorweerde was wart datmen meer uuten vors(creven) goeden/ bevonde gaende dan de vors(creven) xxix mudden corens/ datmen hem dat aen dien erfpacht sculdich soude zijn/ af te cortten na uutwisen van eenen chyrograve dat/ vand(er) coopmantscap d(er) vors(creven) molen tusschen hen gemaect/ was dat hij begheerde aengehoert te hebben dwelc zij/ in wedersijde gelooft hadden tachtervolgen en(de) d(aer) af dat/ jan de clerc die tselve gemaect en(de) gescreven hadde/ elcker p(ar)tien een gelijc gegeve(n) hadde Seide vort dat/ hij bevant dat de vors(creven) molen belast was boven de vors(creven)/ xxix mudden corens met xv stuvers erflic die hij hoopte/ datmen hem afdoen zoude en(de) sculdich wae(re) af te doen/ aengesien dat tchyrograf niet hogher noch meer en begrijpt/ dan de vors(creven) xxix mudden en(de) dat zij sculdich wae(re)n te v(er)vange(n)/ elenen hue(re)r dochter om behoirlike vesticheit den vorscr(even)/ janne vand(er) vors(creven) molen te doen En(de) datmen hem insgelix/ sculdich wae(re) te doen volgen alsulken molensteen als m(er)ten/ de bubbele(re) vand(er) molen hadde gedaen dair voir hij betaelt/ hadde aenden vors(creven) janne de hont ix rijd(er)s en(de) alle/ brieve(n) en(de) munimenten en(de) oic behoeften die zij vander/ vors(creven) molen hadd(en) oft wiste en(de) al na uutwisen vanden/ voirs(creven) chyrograve en(de) levend(er) wairheit dair hijs he(n) toegedraeght/ hopen(de) dat hem des vors(creven) is worden zoude wair hij sijns
//
vermets volquame Op dwelc de vors(creven) weduwe ende hue(r)/ sone deden segghen ontkynnende tvoirs(creven) chyrograf ontfange(n)/ te hebben inde maten de vors(creven) jan mychiels bijleit dat/ de vors(creven) jan de vorg(eruerde) molen genomen hadde om xxix(½)/ mudden corens erflic dair af dat thalf mudde vors(creven)/ hem te betalen come(n) soude in afcorttingen vanden molen/ steene vors(creven) en(de) opde vors(creven) xv st(uvers) erflic out chijs en(de) dat/ hij betalen zoude ix rijd(er)s eens voir den selven/ steen Seiden vort dat zij ind(er) coepmantscap ond(er)/ spraken dat zij vand(er) vors(creven) molen te wynne noch/ te verliese staen en wouden p(rese)nte(re)nde boven desen de/ vors(creven) weduwe hue(re)n eedt dat zij gheene brieve noch/ gescrifte d(er) vors(creven) molen aengaen(de) en hadde noch en wiste/ en(de) alle pointen in feyte gelegen p(rese)nteerden zij te thoene(n)/ en(de) metten mynsten hopen(de) wair zijt gethoenen consten [en(de) den eet volquam(en)] dat/ zij vand(er) vors(creven) aensp(ra)ken ongehouden zijn Wair op de he(re)n/ scepen(en) van loven(en) ter manissen smeyers wesen voir een/ vo(n)nisse na aensprake verantweerden en(de) thoenesse van/ beide den vors(creven) p(ar)tien dat de vors(creven) jan mychiels gehouden/ sal zijn de vors(creven) xv st(uvers) erflijc te dragen en(de) dat de/ vors(creven) zijn weder p(ar)tie hem sal doen restitue(re)n en(de) leve(re)n den/ vors(creven) molen steen dair om questie is oft hem weder/ om restitue(re)n de vors(creven) ix rijd(er)s die de vors(creven) jan de/ hont vand(en) vors(creven) janne mychiels gehave(n) hadde en(de)/ vort gehouden zijn te bringhen thue(re)r eedt alle brieve/ gescriften en(de) ander bescheit d(er) vors(creven) molen aengaende/ die zij ten tijde vand(er) coepmantscap hadde oft wiste/ oft noch heeft onder de wet tot behoef des vors(creven)/ jans en(de) totten rechte p(rese)ntib(us) omnibus scabinis in scampno/ dempto abs(oloens) sept(embris) p(ri)ma