Wij lodewijc roelants ende arnt vanden zande scepen(en) te/ loven(en) doen cont ende kynlijc allen den ghenen die dese/ l(ette)ren sullen sien oft horen lesen dat voir ons comen zijn/ in prope(re)n p(er)sone mynister en(de) gemeyn co(n)vent des godsh(uys)/ vander derder orden(en) van sinte francisci tsinte pauwels/ bynnen deser stat kynnen(de) en(de) lijden(de) oppembarlic dat zij/ uut seke(re)n gunsten en(de) liefden die zij bevonden hebben ende/ dagelix bevenden inden p(er)soen van henricke van schore inge/ seten poirte(r) der stat van loven(en) vors(creven) en(de) die zij inden/ name en(de) van weghen des vors(creven) godshuys al noch inden/ selven wael betruwen den vors(creven) henricke voir hen ende
//
hue(re)n [sijnen] nacomelingen ten bijwesen en(de) consente der he(re)n burg(er)meeste(re)n/ en(de) raide der selver stat en(de) oic der momboirs des voirscr(even)/ godshuys gelooft hebben ende geloven met desen dat zij/ woute(re)n van schore wettich sone des vors(creven) henricx van schore/ dien zij in hue(re)n co(n)vente en(de) als hue(r) co(n)ventuael aenveert/ hebben guetlijc handelen en(de) tracteren zullen en(de) hem gheven/ en(de) aministreren na doot zijns vors(creven) vad(er)s en(de) gertruden zijns/ wijfs so lange hij op dese werelt leven sal van cleede(re)n schoen/ eten drincken en(de) alles des hem ter goeder wijs behoeve(n) sal moge(n)/ behalven dien dat zij soe lange de vors(creven) vad(er) en(de) moeder sijn/ wijf leve(n) sullen niet vord(er) gehouden en sullen zijn hem te besorgen/ dan van zijnen montcoste Item dat zij met den vors(creven) woute(re)n/ dispenseren sullen van te moeten wercken anders oft langher dan/ tusschen de wercclocken Item om deswille dat de zynne des vors(creven)/ wouters bijden wille gods zee(r) broesch en(de) cranc zijn en(de) niet/ zoe sterck als zij wael mochten zoe sal de minister nu/ zijnde en(de) namaels wesen(de) oft zijn substituyt den vorscr(even)/ woute(re)n om de selve zijn synne te conforteren orloven ende/ wille en(de) oic (con)sent dair toe gheven als de vorg(enoemde) wouter/ des aen hen oft in absencien va(n) hen aen e(n)nich vanden/ ov(er)sten bruede(re)n beghert uuten vors(creven) godshuyse te ghane ter/ kercken te s(er)mone te vespe(re)n en(de) om zijnen aflaet en(de) gelikerwijs/ hij nu een wile tijts gedaen heeft en(de) met hem dispensere(n)/ in zijnen opstane slapengaen met lichte guetliker dan de/ strangheit d(en) vors(creven) orden(en) in heeft Ende dat hij niet vasten/ en sal dan de geboden vasten daghe(n) ten wae(re) dat hem alsoe/ te doen geliefde Item wart also dat de vors(creven) wout(er) in e(n)nige(n)/ toecomen(de) tijden nader aflivich(eit) des vors(creven) henr(ix) zijns vad(er)s/ en(de) g(er)truden sijns wijfs hem onwillich zijnde ghave en(de) weder/ spenich maecte int vors(creven) co(n)vent en(de) sonder orlof wille en(de)/ consent als voir uutghinge en(de) uutbleve dat god verhuede/ so sullen de vors(creven) minister en(de) co(n)vent gehouden zijn den/ vors(creven) woute(re)n weder om int godshuys te gecrigen mynlic/ oft anders op dat zij connen Ende oft zij den selven woute(re)n/ gheensins wederom gecrigen en consten soe zullen zij altijt
//
na dat de vors(creven) wouter een jair lanc eemp(er)lijc uut sal hebben/ gheweest gehouden zijn den momboren des vors(creven) wout(er)s/ te weten(e) de meesters vanden vier heylighegheeste(n)/ te loven(en) [tot behoef des voirs(creven) wout(er)s] jairlix te gheven en(de) te betalen vand(er) tijt dat/ hij uutgheweest en(de) uutgegaen wae(re) een jair als voir/ vijfen(de)twintich ryns guld(en) te weten(e) twintich stuvers d(er)/selve mu(n)ten ons gened(ichs) he(ren) ts(er)togen van burg(oignen) ende/ van brabant voir dat(um) des briefs gemu(n)t voir elcken/ der selver r(yns) gul(den) gerekent van jae(re) te jae(re) en(de) van t(er)mijne/ te (ter)mijne(n) also lange de vors(creven) wouter in des(er) werelt leve(n)/ sal en(de) niet langer en(de) telcken t(er)mijne als vervolghde/als verreicte schout dit due(re)nde tot dat de vorscr(even)/ wouter weder int vors(creven) godshuys comen sal zijn Ende/ es vort gevorweert dat de vors(creven) brued(er)s minister en(de)/ co(n)vent den vors(creven) henricke en(de) g(er)truden zijnen wijve geve(n)/ en(de) betalen zullen alle jae(re) te kersmesse vijfen(de)twintich d(er)/ geliker r(yns) gul(den) ind(er) weerde vors(creven) also lange de voirscr(even)/ gehuyssche leven sullen en(de) de leste levende van hen/ beiden leven sal en(de) niet langer Geloven(de) de vors(creven)/ minister en(de) co(n)vent inden name vanden selven hue(re)n den/ eerweerdigen vader prov(in)ciael generael der orden(en) vors(creven)/ in dien te hebben en(de) te vervane dat hij alle die saken/ vors(creven) en(de) yegelijc van dien tusschen dit en(de) paesschen naestcomen(de)/ met hen believen consente(re)n en(de) besegelen sal in alle/ der vuegen en(de) manie(re)n vors(creven) En(de) zoe wanneer dat gedae(n)/ sal sijn en(de) niet eer sal de vors(creven) henric gehouden sijn de(n)/ vors(creven) godshuyse te betalen hondert r(yns) gul(den) goet en(de) ghinge/ te weten(e) twentich stuve(er)s d(er) mu(n)ten ons gened(ichs) he(ren)/ voir elc d(er) selver r(yns) guld(en) gerekent voir dat(um) sbriefs/ gemu(n)t en(de) geslaghen decembris xiiii