Allen den ghenen die dese l(ette)ren sullen sien oft horen lesen ende/ besunder den eerweerdigen en(de) wijsen he(re)n cancell(ie)r en(de) ande(r) vand(en)/ edelen raide ons liefs gened(ichs) he(re)n ts(er)togen geordineert in zijnen/ lande van brabant burgermeeste(re)n scepen(en) en(de) raide d(er) stat van/ loven(en) saluyt en(de) alle vrientscap doen cont en(de) te weten dat/ opden dach datum van desen voir ons comen es in prope(re)n p(er)sone/ jouffr(ouwe) lijsbeth kerreman weduwe willems wilen vand(er) to(m)men ende/ heeft mechtich gemaect geconstitueert gesedt volcomen macht/ en(de) auctoriteit ghegeven tot [sonder] hae(re)n wederroepen woute(re)n vander/ meren bastart van herentals alle en(de) yegewelcke hue(r) goede/ chijse renten pachten en(de) sculden die de vors(creven) jouffr(ouwe) lijsbeth heeft/ inden lande van brabant en(de) men hair sculdich is en(de) namaels/ sal wesen Te manen te eysschen op te boe(re)n en(de) tontfangen aen wat/ p(er)sonen(n) oft te wat steden dat dat zijn mach d(aer) voir te panden/ de dagen te beleiden en(de) rastemente te doen leggen na gewoente/ en(de) costumen vanden plaetsen dair dat behoe(re)n sal oft behoeven/ soude mogen En(de) vortaen alle ande(r) saken die de vors(creven) jouffr(ouwe)/ te doen mach hebben aen wat p(er)sonen dat dat zij oft te wat plaetsen/ dat dat zij en(de) op dats noet gevorde [die] voir allen richte(re)n gheeste/ lijc oft weerlijc met rechte te vervolgen te verantwerden te bescudden/ en(de) te bedingen die te wynnen en(de) te verliesen of composicie oft/ mynlike effeni(n)ghe dair af te maken den sculders van des hij/ ontfangen sal quijt tescelden en(de) quitancie te gheven en(de) vortaen/ generalijc en(de) specialijc allet ghene dair inne te doen ende
//
te vorde(re)n des de vors(creven) jouffr(ouwe) lijsbeth selve soude mogen doen telker/ tijt dat oft zij tegenwordich en(de)n voir ogen wae(r) Geloven(de) vort/ de selve jouffr(ouwe) lijsbeth voir ons in goeden truwen goet vast gestentich/ en(de) van weerden te houden wes bijden vors(creven) procur(eur) in desen gedaen/ en(de) gevordert sal worden in e(n)niger manie(re)n Behoudelijc dat de/ procur(eur) van sijnen vors(creven) bewijnde en(de) inheffen gehouden sal sijn der/ vors(creven) jouffr(ouwe) lijsbetten altoes goede rekeninghe en(de) bewijs te doen/ des ter conden hebben wij burgemeeste(re)n scepen(en) en(de) raide/ der stat van loven(en) vors(creven) den zeghel ten saken der selver stat/ hier op [aen] doen hangen int jair ons he(re)n duysent vierhond(er)t/ vieren(de)tsestich opden xx dach van merte