Item willem de vos en(de) daneel van voshem die over eene wile/ verleden voir meye(r) en(de) scepen(en) van loven(en) in rechte gestaen hebben/ tegen meester pete(re)n bote scholaster der kercken van sinte pet(er)s/ te loven(en) om vijf cap(uyne) en(de) vijf scellinge goets ghelts outs chijs/ die de vors(creven) scholasterie also de selve meester peter meynde ende/ sustineerde van ouden tijden gehadt en(de) gehaven hadde aen een/ dachmale lants luttel myn oft meer ghelegen bij hekelsbogart/ te percweert tusschen den goeden daneels van voshem en(de)/ wilen willems de vos nu jans peters comen(de) metten eenen/ eynde aen de to(m)me en(de) metten ande(re)n eynde aende lande jans/ wilen rosart tusschen twee voetpaden comen(de) vand(er) strate(n) van/ hekelsbogarde Dair op tgedinge tussche de voirs(creven) p(ar)tien geleit/ is soe verre dat de vors(creven) scholaster bethoen gedaen heeft vanden/ registe(re)n ouden bueken der vors(creven) scolasterien opder cap(it)len van/ sinte peters te loven(en) wezen(de) Ende heeft vort gep(rese)nteert als/ scolaster sijn behout vanden vors(creven) chijse en(de) opden vors(creven) gront te/ doen hopende oft hij dat dade dat hem dan den vors(creven) chijs/ van wegen zijnder vors(creven) beneficien volgen zoude en(de) sculdich/ wae(re) te volgen Naden welcken de scepen(en) van loven(en) ter/ manessen smeyers gewijst hebben voir een vo(n)nisse wair/ de vors(creven) scolaster zijn behout dade also hij gep(rese)nt(eert) hadde/ dat hem dan zijnen chijs volgen soude welc behout de/ vors(creven) willem en(de) daneel den vors(creven) scolaster verdroegen ende/ kynden hem sijnen chijs vors(creven) in alle der maten oft hij sijn behout/ gedaen hadde [na recht] p(rese)ntib(us) scabinis in scampno dece(m)bris xx