Item jouffr(ouwe) magriete vand(en) wouwe(re) dochte(r) claes wilen vand(en) wouwe(re)/ geheeten coel claes weduwe roelofs wilen boxhoren in deen zijde en(de) daneel/ boxhorens brueder des voirs(creven) daneels [roelofs] in dande(re) sijn met malcanderen/ eens wordden ende overcomen voer hen hue(re)n erfgenamen ende nae/ comeling(en) als vanden goeden beruerlijc ende omberuerlijc hoedanich die/ zijn gebleven acht(er) den voirs(creven) wilen roelofve der pointe(n) h(ier) na bescr(even)/ die zij deen dande(r) geloift hebben volcomelijc te doen en(de) wel te/ onderhouden Inden yersten eest ghevorweert dat de vors(creven) jouffr(ouwe)/ van allen den voirs(creven) omberuerlik(en) goeden die den voirs(creven) roelofve/ toebehoirden oft die de selve roelof hielt ten tide alse hij aflivich/ wart te wat plaetsen oft naturen die geleg(en) zijn moegen sal/ blive(n) eene tocht(er)sse om die te gebruyken(e) hue(re)n leefdach lanc op alsoe/ dat zij de huyse ende ande(re) goede sal houden in goeden state van wande/ ende dake ende in rep(ar)acien als eene tocht(er)sse sculdich es te doene/ Behalven alleene dat den vors(creven) daneele ombelet vand(er) vors(creven) jouffr(ouwe)/ van nu voirtane sal volgen den beemt geheel die de selve roeloff/ hielt int loevene(re)nbroec te leene gehoude(n) vande(n) proefst van loven(e)/ behalven oic dat den selven daneele insgelix volgen sullen alle die/ leene die de vors(creven) roelof hielt ende hem verstorven wae(re)n oft/ toecomen van wilen jouffr(ouwe) jehanne(n) van grave(n) die wijf was/ jonck(er) lyebrechts hee(re) te meld(er)t (et)c(etera) Met (con)dicien nochta(n) dat de/ vors(creven) jouffr(ouwe) magriete heffen sal alle de p(ro)fite(n) die tot dese(n) daige/ toe vand(en) vors(creven) leenen gevallen sijn zij sijn gehave(n) van hue(r) oft/ hue(re)n wegen oft noch ond(er) die laten staen(de) ende mits dien sculd(ich)/ zijn te dragen aenden voirs(creven) jonch(e)r(e)n lyebrechte de so(m)me van sevenen/ twintich rijders die den selven jonch(e)r lyebrechte van dien goede(n)/ vallen selen in april en(de) in octobri beyde naestcomen(de) op dat hij/ dan leeft Ende die betali(n)ge gedaen sal de vors(creven) daneel van dan/ voirtane de vors(creven) jouffr(ouwe) en(de) hue(r) goede ontlasten en(de) ontheffen aende(n)/ vors(creven) jonch(e)r lyebrechte vand(en) rinte(n) vors(creven) ende behoudelijc oec/ dat den vors(creven) daneele ombelet vand(er) vors(creven) jouffr(ouwe) soe v(er)re alst/ in hue(r) es volgen sullen de erfgoede en(de) rinte(n) die wilen waren/ henrix vand(er) bruggen geheete(n) metten gelde te leefdale gelegen/ voermaels ghewisselt tegen den vors(creven) roelofve voer zeke(re) p(or)ceele(n)/ / van leengoeden die de selve roelof den vors(creven) henrike dair voe(r)/ overgaf in welk(en) goeden en(de) rinten alsoe gewisselt de voirs(creven)/ daneel gegoidt es Item dat beyde de vors(creven) p(ar)tien te gelike deile(n)/ zullen en(de) aenveerde(n) alle de vliegenderve die de vors(creven) roelof hadde/ ten tide alse hij aflivich w(er)t ende desselfs roelofs erfgenamen nae/ der weduwe(n) doot sculdich wae(re)n te volgen Dair af de voirscr(even)/ weduwe huer sal v(er)clee(re)n op dats behoift ende daer sal elck/ van hen met sijnd(er) helicht moigen doen zijnen vryen wille tot/ eeuwig(en) daigen Des sullen zij innestaen malcande(re)n en(de) ten/ gelijken laste draghen allet ghene des derfgenamen van des/ vors(creven) roelofs yerste(n) wive van dien souden moigen eysscen/ oft wynne(n) It(em) oftmen bevonde dat tusscen den vors(creven) wilen/ roelofve en(de) jouffr(ouwe) magriete(n) e(n)nige omberuerlike goede waren/ gecreg(en) dat de helicht van dien den vors(creven) daneele en(de) sijne(n)/ erfgenamen nae hue(r) doot volgen sallen It(em) sal de vors(creven)/ weduwe den vors(creven) daneele schadeloes houden en(de) ontheffen/ van dien vijf rijders lijftochte(n) die de vors(creven) roelof sculdich es/ bleve(n) janne boxhoren dair de vors(creven) daneel borghe voir steet/ Ende van desen zullen de vors(creven) p(ar)tien malcande(re)n voird(er) alle/ vestich(eit) doen die e(n)nigen van hen soude moegen behoeven ten coste/ vanden gheene(n) die die vestich(eit) sal beghe(re)n al sond(er) argelist cor(am)/ roelofs berghen febr(uarii) xii