Opte questie tusschen janne mailerbe rentmeester van heverle/ in deen zijde en(de) joese de beckere in dande(re) alse van dien dat de/ vors(creven) jan meynde dat de vors(creven) joes hem verantweerdt hadde te/ betalen den chijs van heverle opde goede van vaelbeke desgelix/ van woute(re)n vync en(de) tgodshuys van percke verlopen van twee/ ja(r)en dair af de vors(creven) joes niet meer en kynde dan van
//
eenen jare Es getermijneert en(de) namaels geclaert bijden rait/ vander stat na thonisse dair af aengehoert dat de vors(creven) joes/ gehouden sal zijn den vors(creven) rentmeester vanden vors(creven) chijse van/ twee ja(r)en te voldoen mits quitancie die de rentmeester d(air)/ af sal gheven ende dair af de stad wairheit [van lov(enen)] warant sal/ wezen Actum et declaratum in pleno (con)silio sept(embris) xxviii