Vander aenspraken die willem de nausnyde(re) als geleid totten goede(n) have en(de)/ erve jans wilen de clerc voir sijn wettighe scult met scepen(en) brieve(n) van loeven(en)/ geloeft gedaen heeft tot vrancken pynnoc na(tur)lijc alse van drie voede(re)n hoys/ die de voirs(creven) willem seyde dat de voirs(creven) vrancke aengeveerdt hadde vande(n)/ gereeden goeden die acht(er) den vors(creven) janne de clerc wa(r)en bleve(n) en(de) die/ hij meynde dat hem ende sijne(n) beleide te sijnd(er) schout behoef die hij met/ sijnd(er) eedt p(rese)nteerde te verifice(re)n volge(n) soude(n) en(de) dat de vors(creven) vrancke/ gehouden sijn soude hem die te leve(re)n en(de) te restitue(re)n want hijse met/ wille ende sonder recht hadde gehaelt Vanden welken de voirscr(even)/ vrancke hielt de (con)trarie en(de) meynde want tvoirs(creve) hoy comen was/ van tsheilichs geest goede(n) dair af die heiligheest gheen betalinge/ en hadde gehadt dat de voirs(creven) willem aen hem verdoolt ware/ en(de) dat hem tvoirs(creven) hoy tot des voirs(creven) heilichs gheest behoef bliven/ soude Dair op de voirs(creven) willem replice(re)nde meynde dat al wairt/ soe dat tvoirs(creven) hoy van des heilichs gheest goede(n) come(n) ware soe hadde/ de voirs(creven) jan dat gecocht ende lach in sijnen name ende ware de/ voirs(creven) vrancke en(de) ande(re) van des vors(creven) heilichs geests wegen sculdich/ met den hoye te volgen die schout te volgen en(de) met rechte soe/ dat behoirde Was gewijst bijden he(re)n scepen(en) van loven(en) ter maniss(en)/ smeyers nae aensprake en(de) v(er)antweerd(en) van beiden p(ar)tien dat den/ vors(creven) willem(me) en(de) sijnen beleide tvors(creven) hoy tot sijnder schout behoef/ voirg(eruert) volge(n) soude p(rese)ntib(us) o(mn)ib(us) scabinis dempto roelants oct(obris) x