Item uut dien dat henric mascure als procur(eur) met volcomender/ procuracien van janne dantijn welc jan dantijn met scepen(en)/ brieven van loven(e) over lanc gemaect heffende en(de) houden is/ drie rijd(er)s lijftochten vallende jairlix iiii dage in merte aen en(de)/ op zeke(re) goede en(de) onderpande te foul en(de) dair omtrent gelege(n)/ toebehoe(re)nde janne eggoran reyne(re)n frapsaes? en(de) godfrine/ gaiffy hem onlanx metter stat open(en) brieve(n) van versueke/ na deser stat recht heeft doen leve(re)n ende in handen setten de/ selve goede voir tgebrec vand(er) selve(er) renten achterstellich van/ vijf ja(r)en en(de) cost ende co(m)mer als de selve open(en) brieve volco/ mentliker begrijpen onder dofficie(re)n hier na verclaert Te weten/ onder den bailliu van gheete en(de) onder den meye(r) van sinte/ remeys gheest dair dach gedaen wert bijden selven officie(re)n/ den voirs(creven) drie p(er)sonen aen hue(re)n mont om alhier int recht/ te comen oft zij hen tegen de selve brieve oppone(re)n wouden/ opden vii dach deser maent julii [vorleden] welc de selve henrick/ boot te bewijsen met sulken bescheide oft certificacien dat/ hem genoech zoude wezen in rechte Hopende oft hijt/ bewisen conste dat hij dan in zijnre leveringen gehouden/ soude worden totten volcomen voldoen van des vors(creven) is/ ende de selve henric zijnen dach van rechte vorg(eruert)
//
verwarende en(de) continue(re)nde tot op heden zijn wederp(ar)tie vort eysschen(de)/ niemant gecompareert en heeft versueken(de) ten uutersten hier/ op in zijnen vors(creven) scepen(en) brieve(n) ende leveringen gehouden te worden/ Soe es hem gewijst bij vonnissen van scepen(en) van loven(e) dat/ zij begheerden bewijs en(de) clairnesse te horen dat den vors(creven) p(ar)tien/ dach gedaen was ende dae(ren)teynden recht totten welcken/ de vors(creven) henric dach nam tot van heden in viii dagen P(rese)ntib(us)/ roel(ants) tymple colonia ouderogge julii xviii