Vanden gedinghe dat voe(r) meye(r) ende scepen(en) van loeven(en) geweest is/ tussche(n) woute(re)n pep(er)linck als aenlegghe(r) in deen zijde ende jouffr(ouwe)/ lijsbetten weduwe wout(er)s wijle(n) blanckarts v(er)weresse in dande(re) alse/ vande(n) wagen(en) p(er)den metten getouwe dair toe behoiren(de) eender coe ende/ eene(n) volene de(n) voirs(creven) woute(re)n toebehoiren(de) Welke have de voirs(creven) wed(uwe)/ de(n) voirs(creven) woute(re)n die huer wynne was inden hove dat zij heeft te/ kiesekem ter plaetse(n) geheete(n) tsilv(er)berghe omtrint xxvii[te(n)] dach/ van meye lestlede(n) met wille ende sonder recht hadde afgenome(n) ende/ ontweldicht voer schout die zij seggen mochte dat huer de selve wout(er)/ huer wynne sculdich was bleve(n) nochtan dat de voirs(creven) wy(n)ne wel meynde/ huer vande(n) geheele(n) vier ja(r)en dat hij huer goet hadde gehoude(n) al/ voldaen te hebbe(n) Op dat hem te scaden mocht come(n) ende ter cortinge(n)/ des zij in hem van rechts wegen ende uuyt sake(n) d(er) voirs(creven) pechtinge(n)/ was gehouden ende d(aer) af boet hij oick wel bethoen en(de) bewijs te/ doene alsulke alst hem soude behoeve(n) dat hem nae recht soude/ genoech zijn daer ten slote die voirs(creven) wy(n)ne boet te thoene(n)/ dontweldige(n) voirs(creven) ende voirt meer alrehande ande(re) pointe dienen(de)/ totter rekeni(n)gen tande(re)n tijde(n) tussche(n) hem ende zijnder meesterssen/ gemaect voer goede mannen ende oick totten goeden acquijte dat
//
de selve wouter in des voirs(creven) wed(uwe) goet te wynne(n) gedaen hadde/ versuekende ten slote hem zijn voirs(creven) have bijder voirs(creven) weduwe(n)/ ge(re)stitueert te w(er)de(n) ende op dat zij hem d(aer)enteynde(n) ae(n)sprake(n) woude/ hij p(rese)nteerde hem met rechte te v(er)antweerde(n) Op dwelck de voirscr(even)/ wed(uwe) huer v(er)antw(eer)den(de) hoepte d(er) voirs(creven) aensprake(n) ongehoude(n) te zijne/ want zij boet wel te bewisen(e) dat huer ende de(n) hue(re)n de voirs(creven)/ have ende meer ande(re) des voirs(creven) wout(er)s voe(r) hue(r) wettich gebreck der/ voirs(creven) huer(er) gepachte goede beyde in corne ende in ghelde was gelev(er)t/ mette(n) he(re) ende dat zij tande(re)n tijde(n) met malcande(re)n v(er)bonde hadde(n)/ gemaect bij goede(n) ma(n)nen beslicht te w(er)de(n) ende dat die bij toedoe(n)/ des voirs(creven) wout(er)s wa(r)en uuytgesplete(n) ende v(er)smolte(n) ende zunderlinge/ seyde zij dat zij hadde scepen(en) brieve va(n) loven(en) opde(n) voirs(creven) woute(re)n/ pep(er)linck die begripe(n) onder ande(re) dat zij de voirs(creven) have voe(r) hue(r)/ wettich gebreck wel aenveerde(n) mochte ende sonder ande(re) recht/ vorderinge d(aer) op te moete(n) doen met meer reden(en) bij huer gealligeert/ Was gewijst ten uuyt(er)sten bijde(n) he(re)n tscepen(en) va(n) loven(en) ter manisse(n)/ tsmeyers nae aensprake v(er)antw(er)de(n) ende thoenisse van beyde(n) p(ar)tien/ dat de voirs(creven) wed(uwe) gehouden zijn sal de(n) voirs(creven) woute(re)n van zijnd(er)/ voirs(creven) have(n) restitucie te doe(n) ende hadde(n) p(ar)tien dae(re)nteynden/ eenich gebreck aen malcande(re)n dat zij dat vorderden met rechte/ P(rese)nt(ibus) om(n)ibus scabinis dempt(o) colonia octobr(is) xxii