Vander twidracht ende questien die voe(r) den rade vander stat nu ten lesten male gehanghen heeft/ tusschen anthonijse de bezuts voir hem ende/ inden name vanden ande(re)n zijne(n) medeplegheren/ dair voe(r) hij sprect ter eend(er) zijden ende meester/ felix de hont raet en(de) meester vander rekencame(re)n m(ijns) gened(ichs)/[he(re)n] (et)c(etera) metter weduwen joes wilen absoloens swegher/ des voirs(creven) meester felix ter ande(re) Ae(n)ruerende/ eene seke(re) erfrinte verpant ende besedt op/ dlant van dieste wilen toe te hoe(re)n plach barthel(meeuse)/ alser gedraghen(de) jairlijcx tweehondert vijfen(de)vijftich/ rijnsch guld(en) eenen stuver en(de) sess miten vander/ welcker een porcie te weten(e) hondert eenen(de)veertich/ r(yns) guld(en) voirmaels den edelen ende moeghen(de)/ greve van salmen gegoet is geweest ende eene/ and(er) porcie gedraghen(de) jairlijcx hondert vierthien/ rijnsch guld(en) der voirs(creven) weduwe absoloens Ende/ oft die [rente] in rekeninghen souden moeten werden/ gebracht tusschen hen hebben de wethoude(re)n vand(er)/ stat van loeven(e) ov(er)sien ende gevisenteert de/ intenditten die elc vand(en) voirs(creven) p(ar)tien om te heu(re)r/ meyni(n)ghen te comen(e) hebben overgegeve(n) desgelijcx/ beide de guedinghen voirg(eruert) vand(en) voirs(creven) rinten gedaen/ metten condicien ende greacien van p(ar)tien Dair op/ gevolgt acten t(er)minacien en(de) al tgene des hier af tot/ noch is overleden Ende op al rijpelijc geledt/ ende gewoghen dat dat hen dochte dat te deser tijt/ mocht zijn te weghen hebben de selve weth(ouderen)/te desen male overdraghen getermineert ende den/ voirs(creven) p(ar)tien uutgesproken voir recht dat beyde de/[voirs(creven)] p(ar)tien te beider [beyden] zijden p(ro)cederen sullen met/ rekeninghen naevolgende den acten en(de) voir/ t(er)minacien ende dat gheen van hen de rente
//
voirg(eruert) dair inne en sal moeten bringhen behalve(n)/ elcker p(ar)tien nochtan huer wederlegghen van/ des anders rek(ening)[en] ende oick elcken zijnen/ rechte van des hij aengaende den voirs(creven)/ rinten ende anderssins jeghen zijn voirs(creven) p(ar)tie/ met rechte sal willen vorde(re)n actu(m) in pleno/(con)silio dec(embris) s(ecund)[a]