It(em) aert van waenrode en(de) jan vande(n) bossche va(n) wege(n) en(de) als/ kercmeest(er)s te leefdale joes de colvene(re) en(de) wille(m) va(n) ghoten/ va(n) wege(n) en(de) als heylichgheestmeest(er)s te leefdale voirs(creven) in/ deen zijde ende marie na(tuer)like docht(er) he(re)n wout(er)s wile(n) colvene(re) p(ri)est(er)s/ met janne vand(er) donct mesmake(r) wettich man en(de) mo(m)boir der/ selv(er) marie(n) in dande(re) die sekere stoot underlinge met malcande(re)n/ hadde(n) om der goede wille beruerlijck en(de) o(m)ber(uerlijck) acht(er) en(de) nae de/ doot vand(er) voirs(creven) wile(n) he(re)n woute(re)n bleve(n) wair die gelege(n) zij(n)/ oft bevonde(n) moege(n) worde(n) d(air)toe en(de) d(air)inne elc d(er) voirs(creven) p(ar)tien/ meynde ghericht te zijne Sijn bij tussche(n)spreke(n) va(n) eenige(n) goede(n)/ ma(n)nen hue(re)n vriende(n) van inweers zijde(n) v(er)eenicht en(de) v(er)accordeert ind(er)/ mate(n) h(ier)nae v(er)cleert Te weten dat de voirscr(even) marie alle de/ voirs(creven) goede onbelet vand(er) voirs(creven) kerke(n) en(de) h(eyligen)gheeste houde(n) en(de)/ gebruycke(n) sal hue(re)n leefdach lang en(de) de huyse dien goeden/ toebehoiren(de) sal zij soe langhe houde(n) soe langhe zij leeft wel/ en(de) loflijck va(n) wande en(de) va(n) dake als een tocht(er)sse en(de) naede/ doot va(n) hue(r) sele(n) de voirs(creven) kerke en(de) h(eyligen)gheest donber(uerlijcke) goede/ voirs(creven) moege(n) aenveerde(n) zonder wedersegge(n) vande(n) voirs(creven) ja(n)ne va(n)d(er)/ donct d(er) voirs(creven) marie(n) man hue(re)n natuerlike(n) kinde dat zij nu/ heeft oft van yeman(de) anders van hue(re)n weghen behalve(n) elken ande(re)n/ zijnen goeden rechte inden selve(n) goeden ende de vors(creven) gehuyssche hebben/ te huer(er) eedt onder de wet bracht alle de brieve die zij hebben oft weten/ den vors(ceven) omberuerlik(en) goede(n) aengaen(de) die onder de wet staen in des(er)/ came(re)n in een ronde doeze met eene(n) platten decsele om der selver kercke(n)/ en(de) he(re)n god [heyligheest] d(air) mede beholpen te wordde(n) zoe v(er)re alst hen aengaet
//
altoes sond(er) p(re)judijs van desen tractaete ende sij sal huer oic d(air) mede/ moigen behulpen huer daige oft zijs behoifde ende des vors(creven) es/ hebben alle de vors(creven) p(er)sone in hue(re)n p(er)sonen oic gelooft tond(er)/ houde(n) en(de) tacht(er)volgen desgelix hebbe mede gelooft in hue(re)n/ p(ro)p(er)en p(er)sone(n) van wegen der vors(creven) kercken en(de) tafelen wouter/ vanden veken(en) en(de) gheert de smet willem pols en(de) gheerd/ cleynwerck scepen(en) in den voirs(creven) dorpe cor(am) berghe langrode m(ar)cii/ xiii