It(em) eene deylinge ende scheydinge gedaen ende gemaect zijnde/ tusschen jonch(e)r ja(n)ne pynnock sone hee(re)n jans wilen pynnoc/ ridders dien hij hadde vand(er) edelre ende wael geborender/ vrouwe lijsbeth van heurne outste dochter van perweys te voe(re)n/ uut den broode d(er) selver zijnder vrouwe moeder gedaen totten/ welcken de selve vrouwe lijsbeth als gebuertighe vrouwe/ gelooft heeft ter manissen van p(ar)tien te vervangen hee(re)n ja(n)ne/ van asa geheeten brant hee(r) van grobbendonck ridder/ hue(re)n wettigen man en(de) momboer dat hij des nae bescreve(n)/ is ratifice(re)n agree(re)n ende van weerden houden sal ende/ gelove(n) te houden desgelijcx tvoirs(creven) uuten broode doen/ huers voirs(creven) soens believe(n) henricke amelrijke emonde ende/ lodewijke pynnock gebruede(re)n des voirs(creven) wilen hee(re)n jans/ ter eender zijden jouffrouwen m(ar)grieten lijsbetten en(de) lowijsen/ pynnock gesuste(re)n dochte(re)n wilen amelrijcx en(de) suste(re)n der/ voirs(creven) gebruede(re)n elc met eenen mo(m)boir hen verleent in dander/ Vanden onberuerliken chijs ende eygen goeden die wilen toe/ te hoiren plagen hee(re)n symone wilen pynnoc ridde(r) oom der/ voirs(creven) gebruede(re)n ende suste(re)n pynnocx ende oude oom des voirs(creven)/ joncker jans ende oic die toe te behoiren plagen amelrike wilen/ pynnock vader der voirs(creven) gebruede(re)n ende suste(re)n ende oudervader/ desselfs jonch(e)r jans wie vand(en) selven twee gebruede(re)n her
//
symoen oft amelrijc uut den selven chijs oft eygen(en) goeden/ gestorven is/ Soe zijn bleven ende gevallen den voirs(creven) jonch(e)r janne ende/ vier gebruede(re)n voirscr(even) in huer deylinge te gelijken deelen/ te besitten alle de chijse ende eigen(en) goede die de voirs(creven)/ wilen her symoen te houden ende te besitten plach inde p(ro)chie/ van libbeke metten hove ende goeden geheeten vand(en) voerde/ in huysen hoven wynnen(de) landen beemden eusselen bosschen/ chijsen rinten pachten rechten ende heerlicheid(en) met allen den/ ande(re)n toebehoirten met wat namen die genoemt zijn oft ond(er)/ wat hee(re)n die hoven oft resorte(re)n het zij vanden prioer van/ bierbeke her augustijne vanden borchove(n) ridde(r) jacoppe de/ witte janne wilen vanden hove oft ande(re)n Desgelijcx een/ stuck bosch gelegen te cockey neven tempelgat en(de) oic een/ stuck beemps gelegen te houdert die jaerlijcx versprinct/ jegen ande(r) goede ald(air) op alle trecht co(m)mer ende last d(air)/ voe(r) uutgaen(de) ten gewoeniken tide te gelden ende te betalen(e)/ Ende voirtmeer op eene(n) voirde(re)n last ende co(m)mer van dertich/ hollan(sche) gulden(en) achtenveertich pl(a)c(ken) alsulcker mu(n)ten ons/ princen oft zijnder genaden voirseten als nu van hande te/ hande loepen voe(r) elcken gulden(en) gerekent jaerliker ende/ erfliker rinten te betalen jaerlijcx deen helicht te kersmesse/ en(de) dander helicht sint jansmesse midsomer dierste betalinge/ inne te gane te kersmesse naestcomen(de) te weten(e) elcker/ der voirs(creven) drie gesuste(re)n thien hollan(sche) gulden(en) d(air) af Met/ erfvorweerden ende condicien hier inne besproken dat de/ voirscr(even) gesuste(re)n ende elcke van hen ende hue(r) nacomelinge/ de voirs(creven) jaerlij[c]sche rinte van thien hollan(sche) guld(en) sjaers/ sullen trecken jaerlijcx altoes tot ewigen dagen ten termijne(n)/ als die voirscr(even) staen los vry ende ombelast van e(n)nigen cortsel
//
te derven doen van e(n)niger beden scattingen impositien settingen/ mesraken oft van schaden hoedanich die wae(re)n oft bij wien opgesedt/ oft die op de selve rinte oft onderpande der selver jaerlijcx/ oft bij tide comen oft gesedt mochten werden yet te gelden in/ e(n)niger manie(re)n Ende voirts dat tkintsgedeelte en(de) porcie/ des voirs(creven) jonch(e)r jans inden chijs ende eygen(en) goeden voirger(uert)/ vander voirs(creven) rinten van dertich hollan(sche) gulden(en) jaerlijcx/ met meer ghelden noch dragen en sal dan vier der voirs(creven)/ hollan(sche) guld(en) ende sesse pl(a)c(ken) der weerden voirs(creven) ende dat/ de gedeelten vanden ande(re)n gebruede(re)n hen inde selve/ goede mids desen behoiren(de) vanden surplus vand(er) voirs(creven)/ rinten tgedeelte des voirs(creven) jonch(e)r jans los houden/ selen ende ontheffen Ende behoudelijck oic dat de/ voirs(creven) joncker jan ende de voirs(creven) vie(r) gebruede(re)n de voirs(creven)/ rinte van dertich hollan(sche) guld(en) sullen moegen quiten/ ende afleggen alst hen gelieft te meer malen mair met/ min dan vijf hollan(sche) gulden(en) smaels ende elcke(n) pe(n)ninck/ d(air) af met achtien pe(n)ningen in geliker weerden en(de) met/ vollen rinten van dien termijne dair inne de quitinge/ geschieden sal Oft de voirs(creven) gebruede(re)n moegen oic/ te hue(re)n coste de selve rinte op ande(r) goede loflijke/ pande binnen der ba(n)mylen van loeven(en) gelegen den voirs(creven)/ gesuste(re)n besetten verpanden en(de) bewijsen moegen oic te/hue(re)n coste Gheloven(de) de selve joncker jan ende vier/ gebruede(re)n vanden voirs(creven) goeden ende onderpanden genoech/ te doen(e) oft den voirs(creven) gesuste(re)n dair af yet te nauwe/ gedaen wae(re) ende die te warande(re)n op den gront ende/ hee(re)n chijs der selver ende opden last vander rinten/ der erfenissen bijden testamente des voirs(creven) wilen her/ symoens op de selve goede gesedt van welcken besetsel/ oft rinten der messen voirs(creven) de selve jonch(e)r jan ende
//
vie(r) gebruede(re)n gelooft hebben de selve onderpande jaerlijcx/ in orber der voirs(creven) gesuste(re)n ende hue(re)n rinten voirs(creven) te/ ontlasten alsoe dat den selven susteren en(de) hue(re)n nacomelinge(n)/ tot v ewigen dagen vast ende seker sal wesen Geloven(de)/ voirt de voirs(creven) jonch(e)r jan ende de voirs(creven) ge vier gebruede(re)n/ pynnocx voir hen hue(re)n erven en(de) nacomelingen den voirs(creven)/ gesuste(re)n hue(re)n erven ende nacomelingen oft de/ voirs(creven) onderpande in toecomen(de) tiden bevonden werden/ voe(r) de voirs(creven) dertich hollan(sche) guld(en) erfliker rinten niet/ goet genoch te zijne dat zij dan ter manissen der/ voirs(creven) gesuste(re)n ende elcker van hen oft recht van/ hen oft e(n)nigher van hen hebben(de) totten voirs(creven) panden/ noch ande(r) loflike pande voir de voirs(creven) dertich hollan(sche)/ gulden(en) goet genoech zijnde wettelijc ende nae/ recht verpanden ende veroblige(re)n sullen alsoe/ dat dat den selven gesuste(re)n ende elcker van/ hen voir hen hueren erven ende nacomelingen vast/ ende seker sal moegen zijn Behoudelijck den/ voirs(creven) joncker janne ende gebruede(re)n ende elcken van/ hen inde voirs(creven) rinte hue(r) quiten ende elswair te moegen/ bewijsen gelijc voirscr(even) steet cor(am) eisd(em)