Cond zij allen lieden dat jan vanden borchove(n) ende raes/ vanden borchove(n) zijn sone ter eenre zijden ende wouter/ van coelhem van weghen meest(er) lambrechts vander ee/ raet ons gened(ichs) hee(re)n sh(er)togen dien hij hier inne gelooft/ te vervange(n) binne(n) eene(n) halve(n) jae(r) naestcomen(de) dat hij/ dese vorweerden anoe(re)n sal en(de) gelove(n) oic die vand(en)/ borchove(n) tonderhouden ter ande(re) veraccordeert ende/ vereenicht sijn op de come(n)scap ende coop vand(en) goeden/ van quabeke met hue(re)n toebehoirt(en) inder p(ro)chien van/ vertrike ende dair omtrint gelege(n) inder vuege(n) hier/ nae verclaert Te weten(e) dat de voirs(creven) wouter van/ coelhem van weghen als bove(n) in coope hebben sal thuys/ te vertrike geheeten van quabeke boven ende beneden/ swaters alsoe wel dat de wynne besedt als anders/ met alle der toebehoirte(n) dair aen vast ligghen(de) met
//
den landen ende weyden die de wynne(n) tot noch gehouden/ hebben metter pechtinge(n) metten coren moelen(en) en(de) smoutmolen(en)/ den wate(re)n ald(aer) drie cleyne(n) bosschelkens den panhuyse den/ wijng(ar)de den beemde te bivorden den landen te willebringe(n)/ die ter helicht gaen en(de) vier cleyne(n) beemdekens gelden(de)/ twee ryns guld(en) tweelf st(uvers) oft dair omtrint met oic/ den buten pachte totten voirs(creven) goede van outs behoeren(de)/ gedragen(de) omtrint vier ende veertich mudden rocx d(er) mate(n)/ van thiene(n) en(de) vijf en(de) een half mudd(en) even(en) der selver maten/ metten scellinge(n) penni(n)gen cap(uyne) ende gansen die van outs/ totten voirs(creven) goeden van quabeke behoirt hebben metgaders/ eene(n) peter erflijc diemen heeft aen ende op een huys/ ende hoff weyns brieders gelege(n) te vertrike opde vort/ tsame(n) metter heerlich(eit) van goeden ende ontgoeden der/ goeden dair de voirs(creven) chijsen op staen p(er)tkoe(re)n en(de) laten/ totten voirs(creven) goeden ende heerlich(eit) van quabeke behoe(re)nde/ uutgenomen alleene de pachten ende chijse hier nae/ genoemt die bij tiden der voirs(creven) vanden borchove(n) alst/ schijnt afgequijt sijn die buten der voirs(creven) come(n)scap blive(n)/ Te weten(e) yerst aen clase uute(n) lyemi(n)gen vijf cap(uyne)/ tweelf d(eniere) een half mudde even(en) It(em) aenden selve(n) twee/ en(de) eene(n) halve(n) capuyne(n) elf d(eniere) twee en(de) een half mol(evate)/ even(en) It(em) aen den selve(n) eene(n) cap(uyn) vijf d(eniere) and(er)halff/ mol(evate) even(en) ende een vierdel van eene(n) mol(evat) even(en)/ It(em) aen den selve(n) eene(n) cap(uyn) vijf d(eniere) twee mol(evate) even(en)/ It(em) aen jacoppe uuten lyemi(n)ghen eene(n) cap(uyn) vier d(eniere) and(er)half/ mol(evat) even(en) ende een vierdel van eene(n) mol(evat) even(en) It(em)/ aen den selve(n) twee en(de) eene(n) halve(n) cap(uyne) thien d(eniere) twee/ en(de) een half mol(evate) even(en) It(em) aen arnde van lare vier/ cap(uyne) sesse scelling(en) blijft nochtan op tgoet eene(n) d(enier) It(em) aen/ gorde scoelmeesters eene(n) cap(uyn) It(em) aen henr(icke) van gorssem/ drie cap(uyne) It(em) aen pauwels genette(n) nege(n) cap(uyne) vierthien d(eniere)
//
It(em) aen woute(re)n vanden borchove(n) tweelf en(de) een half/ mol(evate) even(en) rocx It(em) aen henricke de mu(n)tere twee en(de)/ een half sacken en(de) een half mol(evat) rocx It(em) aen gielijse/ den sald sadelmake(re) nege(n)entwintich mol(evate) rocx It(em) aen/ henr(icke) van gorssem nege(n) mol(evate) rocx It(em) aen qui(n)ten de/ raymake(re) vijf mol(evate) rocx It(em) aen berebemshoff sesthien/ mol(evate) rocx It(em) aen gorde merselis vier mol(evate) rocx It(em) aen/ henr(icke) hauront twee sacken rocx It(em) aen jacoppe van/ meensele drie mol(evate) rocx It(em) aen lodewijke lyebois/ vierthien mol(evate) rocx It(em) aen gorde vand(en) nyeuwenhuyse/ vierthien mol(evate) rocx Welke p(ar)tien de voirs(creven) vand(en)/ borchove(n) verclaert hebben dat gequeten ende afgeleet/ zijn dair om de voirs(creven) coope(r) dair inne gheen recht/ hebben en sal It(em) hebben de voirs(creven) vercoope(re)n voirts/ vercocht eenen beemt gelegen te vertrike in dbroec/ die her henric de p(er)soen te hueren plach Van/ welcken goeden ende p(or)ceelen voe(r) gespecificeert in/ specie oft in genere de voirs(creven) jan ende raes met/ raes kinde(re)n die tot hue(re)n dagen come(n) zijn gelove(n)/ sullen genoech te doen(e) ende warande(re)n die op tchijs/ en(de) recht der hee(re)n vand(en) gronde Ende voirtmeer/ op hondert twintich ryns guld(en) en(de) achtien chijs guld(en)/ erflijc die barthel(meeus) vand(en) ee van wegen zijnder/ huysvrouwe(n) op de voirs(creven) goede houden(de) is ende oic/ op alsulcke tweeentwintich mudd(en) corens der voirs(creven)/ maten van thiene(n) ende sessendertich hollan(sche) guld(en)/ erflijc als vrouwe m(ar)griete va(n) ophem wettige/ huysvr(ouwe) shee(re)n van yttre op de voirs(creven) goede houden(de) is/ Ende sullen voirts gelove(n) de ongedaeghde kinde(re)n/ des voirs(creven) raes als zij gedaecht zijn te vervange(n)/ van geliken te doen(e) Tot desen hebben de voirs(creven)/ vand(en) borchove(n) den coepe(r) vercocht ende gelooft/ guedinghe ende vestich(eit) te doen(e) van allen ande(re)n/ goeden ende rinte(n) hoedanich die zijn leen eyge(n) oft erve
//
die totten voirs(creven) goeden van quabeke behoirt hebben waer/ de voirs(creven) coope(r) die vynden mach oft in wiens handen die/ staen op dat de voirs(creven) vand(en) borchove(n) van dien goeden/ alsoe in (contra)rie genoemt gheene gelofte van ghenoech doen/ noch warandeerscape gedaen en hebben Voirt sullen/ de voirs(creven) vand(en) borchove(n) den voirs(creven) coope(r) overdrage(n) ende/ transporte(re)n alle trecht ticht ende actie die zij hebben/ oft hebben moege(n) in e(n)nige(n) goeden oft rinte(n) te geneval oft/ elswaer gelege(n) oft oic p(rese)ntacie(n) oft collacie(n) aengaen(de) den/ messen oft gods diensten gefondeert voirmaels bijden hee(re)n/ van quabeke inde kercke te vertrike oft op thuys te/ quabeke voirs(creven) om dat recht ende interest vand(en) voirs(creven)/ coope(r) oft van wege(n) der gods diensten te moege(n) vervolge(n)/ Al waert soe oic dat dair af yet wae(re) vertiert oft/ gemindert ende dat de voirs(creven) vand(en) borchove(n) genoechdoen/ oft waerscap d(aer) af hadden gelooft Item de voirs(creven) vercoope(re)n/ sullen den voirs(creven) coope(r) van al des voirs(creven) is nae den ondersceyde/ voirscr(even) doen goede guedinge en(de) behoeflike transporte/ tallen plaetsen dair dat den coope(r) diene(n) mochte oft/ behoeve(n) ende elc sal des drage(n) vand(en) laste d(aer) toe hoerende/ dat hij nae gemeyn lantrecht sculdich is Behalve(n) dat/ de voirs(creven) vand(en) borchove(n) en(de) de coope(r) sullen dage(n) te gelike/ de h(er)gewede die uut ocsuyne deser come(n)scap te ghelden sullen/ zijn mair cam(er)linc recht boec recht ma(n)nen recht ende/ dier gelike sal drage(n) de voirs(creven) coep(er)e alleene It(em) de voirs(creven)/ vercoope(re)n sullen den coope(r) overgeve(n) alle brieve(n) boecken/ rollen en(de) ande(r) scriftue(re)n den voirs(creven) goeden aengaen(de) te hue(re)r/ eet Mair die sullen inden overgeven(en) int reg(ist)re vander/ stad van loeven(en) geanoteert werden en(de) sullen d(aer)af de/ vercoope(re)n vanden coope(r) hebben recepisse te dien ynde/ dat zij metter voirs(creven) geloften van ghenoechdoen(e) oft waran/ deerscape vanden coope(r) noch zijne(n) nacomelinge(n) niet en sullen
//
werden gepraemt hen en sullen te baten come(n) ofts hen/ behoeft de voirs(creven) gea(n)noteerde boecken brieve(n) rollen en(de)/ scriftue(re)n It(em) de voirs(creven) vercoope(re)n sullen den voirs(creven) coope(r)/ overgeve(n) met rechte inder bester vorme(n) alle opticht actie/ en(de) interest hen e(n)nichssins toebehoeren(de) oft geboe(re)nde ter causen/ van dat berth(olomeeus) vander ee oft zijn voirsete(n) eene(n) tijt van/ jae(re)n bij fauten van betalinge(n) hue(re)r voirs(creven) rinten mids/ leveringe(n) de voirs(creven) goede in handen hebben gehadt aen/ de voirs(creven) vercoopers gehouden zijn van rekeni(n)gen te doen/ afhouwen(de) van houte oft anders dien aengaen(de) Item/ sullen de voirs(creven) vercoope(re)n den coope(r) tsijnder manissen doen/ bliken bij goeder quitan(cien) dat de hee(r) van yttre en(de) zijne/ huysvr(ouwe) van allen acht(er)stelle huerder rinten voirs(creven) des(er)/ goeden aengaen(de) vernuecht zijn tot des(er) dage [toe] soe verre/ de voirs(creven) goede met rechte dair af souden moege(n) werden/ gepraemt It(em) sullen de voirs(creven) vercoope(re)n d(aer) voe(r) innestaen/ dat zij gheen van desen goeden oft rinte(n) voirs(creven) soe verre/ hue(r) waerscap strect nieman(de) versedt verhuert noch/ verpacht en hebben It(em) de voirs(creven) vercoopers sullen/ den voirs(creven) coope(r) voir al oic afdoen alle beleyde van/ scepen(en) brieve(n) van loev(en) die op dese goede slaen oft/ gedaen moege(n) wesen totten dage der guedinge(n) van wien/ dat zij It(em) dit al volbracht en(de) niet eer sal de/ voirs(creven) coope(r) den voirs(creven) vercoopers geve(n) achtenvijftich/ ryns guld(en) te tsestich pl(a)c(ken) tstuc Ende is te weten(e)/ dat hij de achtentwintich guld(en) van dien sal moeghen/ afdoen aen berthel(meeus) vander ee ende soe sullen de/ vercoopers volbetalen de voirs(creven) vanden borchove(n) den/ scepen(en) brief van loeven(en) die zij voirtijts a(nn)[o] xiiii[c]/ lix nove(m)br(is) xiiii gelooft hadden ja(n)ne wilen ts(er)claes/ sweer des voirs(creven) bertel(meeus) spreken(de) van hondert twintich/ ryns guld(en) ende achtien chijs gulden(en) dair af noch in/ reste uutstaen de selve achtentwintich ryns guld(en)/ ende dander dertich ryns guld(en) sal de coepe(r) den selven
//
vercoope(re)n betalen in ghereeden gelde en(de) d(aer)entinden salmen/ de voirs(creven) gelofte van scepen(en) brieve(n) te nyeute doen It(em)/ hebben de voirs(creven) vand(en) borchove(n) besproken ende heeft hem de/ voirs(creven) coope(r) dair inne verlooft dat hij den voirs(creven) hee(r) van/ yttre noch zijn huysvr(ouwe) van hue(re)n voirs(creven) rinte(n) opde voirs(creven)/ goede staen(de) de welcke zij nae inhoudt der br(ieve) elder/ assigne(re)n moege(n) met afsetten bewijsen noch oic quite(n)/ en sal hij en sal yerst de voirs(creven) vand(en) borchove(n) oft/ hue(r) oiren dair af adverte(re)n Te dien ynde want de/ selve rinte des voirs(creven) hee(re)n van yttre ende zijnder vr(ouwe)/ verpant steet aen de voirs(creven) vand(en) borchove(n) voir seke(r) actie/ die de selve vanden borchove(n) in seke(re)n gevalle totter/ voirs(creven) rinte(n) hebben alst blijct inder stad [van loev(en)] reg(ist)re ond(er) gerard(us)/ van baussele vand(er) daet xiiii[c] vijftich opden derde(n) dach va(n) julio/ dat alsoe de selve vand(en) borchove(n) ende oic de voirs(creven) coope(r)/ te bat moege(n) besorcht zijn ende sonder last des voirs(creven) coopers/ It(em) want de seven sacken corens erflijc vand(en) voirs(creven) twee/ entwintich sacken aen de hee(r) van yttre noch te bewijsen/ staen oft gebuerde dat de hee(r) van yttre de voirs(creven) vanden/ borchove(n) voe(r) de bewijssenisse van dien praemde oft pramen/ woude soe heeft gelooft de voirs(creven) cooper voir he(m) en(de) zijn/ nacomelinge de voirs(creven) vand(en) borchove(n) van dien te ontlasten/ en(de) ongelast te houden want de coop(er) den geheelen co(m)mer/ voirs(creven) des voirs(creven) hee(re)n van yttre te hemweert bij deser/ come(n)scap genomen heeft cor(am) vos ty En(de) soe wa(n)neer de/ voirs(creven) meester lambrecht voir scepen(en) van loev(en) geavoeert/ heeft dit tractaet ende gelooft den voirs(creven) vand(en) borchove(n)/ vast tonderhouden dal sal de voirs(creven) wouter des(er) geloften/ ontslage(n) zijn cor(am) vos tybe m(ar)tii x