Want peter van dormale als geleyt nae des(er) stat recht/ tot allen den goeden have ende erve henr(ix) wilen vand(en)/ velde hem oft tyboute steenweechs der stat bode in zijne(n)/ name mett(er) statbrieve(n) gescr(even) aenden meye(r) van werchte(r) oft/ zijne(n) stedehoud(er) hadde doe(n) leve(re)n alle de selve goede en(de)/ dach van rechte beteykent he(re)n ja(n)ne scelkens p(ri)este(r) janne/ zomer willem(me) raeps janne woutiers en(de) ja(n)ne van boesschot/ oft zij tege(n) de voirscr(even) leveringhe yet hadde(n) wille(n) allige(re)n/ tot eene(n) zeke(re)n voirleden(en) dage die tot op hede(n) v(er)streke(n) es/ Aldair de selve p(er)sone niet gecompareert en zijn den/ voirs(creven) geleydden trecht voirt v(er)sueken(de) soe hebbe(n) de/ scepen(en) van loven(en) ter manissen smeyers gewijst voir een/ vo(n)nisse nae dat hen behoirlijck heeft gebleke(n) bij resc(ri)pte/ ghijsbrechts lobbe meyers te werchte(r) de voirscr(even) leveri(n)ge/ ende dach bescheydinge geschiet te zijne datmen den/ voirscr(even) geleyden vanden voirscr(even) goeden houden soude/ inde macht va(n) zijne(n) voirscr(even) beleyde zoe v(er)re dat noch/ voir scepen(en) come(n) es cor(am) om(n)ibus scab(inis) in scampno dempt(is)/ roelants hove ap(ri)lis xviii