Cond zij allen lieden dat roelof reymaer en(de) lijsbeth scusters/ zijn wijf in p(rese)ncia hebben gehuert en(de) bekint gehuert te hebben(e)/ jegen hee(re)n ja(n)ne ballinck prieste(r) cappellaen der kercken van sinte/ peters te loeven(e) en(de) henricke vander horst als man en(de) momboir/ lijsbetten ballincx zijnre huysvrouwen wettige suster des voirs(creven)/ hee(re)n jans de huysinge(n) metter stoven smissen en(de) allen den toe/ behoirten gelijc die belegen zijn inde steenstrate opde brugge Te/ houden te hebben en(de) te besitten metten haefliken goeden en(de) vliegen(de)/ erve h(ier) nae bescreve(n) dairinne zijnde Inden iersten xxxvi bedden/ elc bedde metten coetsen en(de) saergien dair toe behoiren(de) xxxi paer/ slapelaken lviii o(m)meslage xxix oercussen(en) xi becken(en) soe cleyne/ soe groote vier ketele xxv wynden viii mutsen drie badecuypen/ drie tderdecuypen iii waschcuypen twee cleyne cuypkens dwater/ mede inde bade te draghen twee eemers en(de) een buyccuype gescat/ zijnde tsamen dese voirs(creven) beruerlike goede metten gesworen(en) scatters/ op de so(m)me van [vacat]/ Van sint jansmisse naestcomen(de) eenen t(er)mijn van drie ja(r)en eenp(er)lijc/ sonder middel volgen(de) Elcx jairs dae(re)nbynnen om en(de) voe(r) vie(re)ntwintich/ stuvers de weke drie pl(a)c(ken) voir den stuver gerekent Met vorweerden/ en(de) condicien oft teniger tijt bynnen den selven tijde soe vroeze dat/ de voirs(creven) gehuysschen acht daghen lang teynden een mits belette van/ vorste de voirs(creven) stove niet en heytte(n) en(de) alsoe stille staen moeste dat dan/ de selve gehuysschen de pe(n)ninge vanden tijde dat hij [die] alsoe stille moeste/ staen selen moegen onderhouden sonder die te betalen totter tijt dat zij die/ stove weder selen beghinnen te heyten en(de) alsoe neringe doen selen En(de) selen alsdan/ tverlet dat zij alsoe tachter bleven selen zijn moeten opleggen alle weken/ te weten(e) elke weke vervolgen(de) de helicht vander hueri(n)gen van eenre/ verletter weken voirscr(even) Welke goede en(de) have voirs(creven) de voirs(creven) gehuysschen/ ten uutgane vanden voirs(creven) t(er)mijne wedero(m)me selen moeten doen schatten/ En(de) oft zij dan arger bevo(n)den wordden dat sullen de selve gehuysschen moeten/ oprichten Ende oft die dan beter bevonden worden dat salmen hen v(er)ghelden/ oft aen de voirs(creven) huere afslaen Item selen de voirs(creven) h(er) jan en(de) henrick/ moeten de huysinge vander stoven ende smissen houden den voirs(creven) t(er)mijn due(re)nde/ van wande en(de) van dake wel en(de) loflijc Ende de voirs(creven) gehuysschen selen/ de stove moeten houden vanden kakelen en(de) plankie(re)n te hue(re)n laste En(de) wes/ aen de plankie(re)n oft kakelen bynnen desen t(er)mijne gebroken wordde dat/ sullen de selve gehuysschen doen repare(re)n thue(re)n laste al warent/ meer dachue(re)n dan eene Voirts hebben de voirs(creven) gehuysschen/ gelooft dat zij inde voirs(creven) stove bynnen den voirs(creven) tijde gheen oneerbair
//
geselscap houden en selen bij daghe noch bij nachte dairaf de gebue(re)n oft/ ande(re) hen becroenen mochten En(de) dat zij oic bynnen den selven tijde gheene/ o(n)eerbair geselscap met hen woenen(de) en(de) selen houden noch aenveerden/ En(de) oft bevo(n)den wordde dat zijt daden dat zij dan gehouden/ souden zijn te betalen den voirs(creven) hee(re)n ja(n)ne en(de) henricke de geheel/ hue(re) van eene(n) jare Ende es voirt vorweerde soe v(er)re de voirs(creven) gehuysschen/ twee weken tynden een lieten ov(er)gaen als zij geheyten consten sonder/ betalen dat dan de huere van dien jare dair dat inne gebuerde/ gevallen sal zijn Ende waert oic dat de voirs(creven) gehuysschen tot/ e(n)niger tijt merckelijc belet waren en(de) stille moesten staen mits/ uutpandingen vander haven inder voirs(creven) stoven zijnde voir gebreck/ van chijse oft ande(re)n belette dat zij dan soe lange de voirs(creven) stove stille/ steet gheen huere en selen derven gheven Ende den cost vander ierster/ en(de) lester scattingen voirs(creven) selen p(ar)tien in beyden zijden te gelijke te gelijke/ draghen en(de) ghelden Ende alle dese vorweerden condicien en(de) geloften/ voirs(creven) hebben(de) de voirs(creven) h(er) jan renu(n)c(ians) en(de) henric in deen zijde en(de) de voirs(creven)/ gehuysschen in dande(re) malcande(re)n gelooft vast en(de) gestentich te houden/ en(de) te voldoen(e) tallen tijden en(de) t(er)mijne(n) als die vallen en(de) verschijnen/ selen quol(ibet) ass(ecutu)[m] cor(am) b(er)them reth(eman) junii ix