Bijden rade vand(er) stad sijn gecompareert h(er) ghijsbrecht/ van bakelen op deen zijde en(de) de scepen(en) sdorps van/ lynden op dande(re) Aldaer de selve h(er) ghijsbr(echt) exhibeerde/ seke(re) scepen(en) brieve voir de selve scep(enen) van lynden/ geexhibeert dair mede hij thoende hoe dat hij/ metten richte(r) ald(aer) uutgedaecht hadde mits faute(n) van/ betaling(en) van chijse seke(re) onderpande toebehoe(re)nde gielijse/ den rode en(de) gaf te kenne(n) hoe dat de selve brieve/ niet gemaect en(de) gegrosseert en wae(re)n in alder manie(re)n soe/ dat behoirde Te weten(e) want zij ald(aer) niet inne gesedt/ en hadde de selve onderpande(n) met hue(re)n reeng(enoten) gelijc hij die/ metten lantmete(r) en(de) der wet ald(aer) hadde doen meten nae dat/ hij die voirs(creven) goede hadde uutgedaecht meynende dat dat/ oic sculdic wa(r)e in de voirs(creven) brieve te comen(e) metter uutdaginge(n)/ hopende ende meynende alsoe dat zij sculdich souden zijn de/ selve brieve te vernuwen(e) gelijc dat behoerde Aldaer/ die vand(en) dorpe deden seggen dat p(ar)tien gheene conde en/ wert gedaen ten tide doen de palinge geschiede oec soe en/ hadden zij aldaer gheene teeken(en) van palinge(n) gesedt gelijc/ men sculdich ware van doen(e) alst nae recht geschiet wa(r)e/ mair hadden alleene dair bij geweest daer de lantmetere/ metten hee(re) de lande simplicit(er) overmat sond(er) meer hoepte(n)/ mits desen dat zij hue(r) brieve(n) wel gemaect hadden vanden/ uutdagen(e) gelijc dat voir hen geschiet was en(de) meynden/ dat de palinge daer niet sculdich en wa(r)e inne te comen(e) mits/ dien dat die langen tijt nae duytdag(ene) geschiet was en(de) oec/ niet volcomelijc de palinge nae recht geschiet en was gelijc/ dat behoirde met meer reden(en) bij hen soe metten monde soe
//
met gecrifte in beyden zijden gealligeert Ende alsoe p(ar)tien int/ lange gehoert sijnde Es bijden selven rade geappointeert dat/ de brieve vanden uutdagen(e) bliven souden inder manie(re)n gelijc/ dat die gepasseert wae(re)n en(de) geliefde h(er) ghijsbrechte e(n)nich/ voirder besorch te hebben(e) vand(er) palingen nae geschiet dat hij/ dair af sijne meyni(n)ge ov(er)geve(n) soude van vrijdage naestcomen(de)/ in acht dage(n) den selven scepen(en) om hen d(aer) op te verantwerd(en)/ en(de) d(aer)entinde(n) recht In (con)s(ili)[o] opidi octobr(is) xxvii