Wij berthem moelen scepen(en) van loeven(en) doen cond/ allen lieden dat voe(r) ons come(n) sijn gabriel offus met ja(n)ne/ vand(er) to(m)men zijne(n) behuweden sone in deen zijde en(de) her/ jan de grove priester ter ande(re) kennende en(de) lijdende/ dat zij met malcande(re)n in erfvorweerde(n) overcomen sijn/ der pointen nae bescreve(n) die zij deen den ande(re)n gelooft/ hebben tonderhouden Inden yerste(n) dat de voirs(creven) h(er) jan uut/ den huyse met zijne(n) toebehoirte(n) gelegen inde hoelstrate/ dwelc hij jege(n) den voirs(creven) gabriele gecrege(n) heeft erflijc/ drage(n) sal en(de) betalen den voirs(creven) gabriele alsulcke(n) twee/ r(yns) guld(en) als de selve gabriel jegen de meesterssen en(de)/ provisore(n) vand(en) grooten beghijnhove afgequijt en(de) gecrege(n)/ heeft en(de) die de selve vand(en) beghijnhove hadde ende/ meest(er) claes lobbele priest(er) plach te heffen op thuys geleg(en)/ inde selve strate tussche(n) de goede meest(er) jans wynckel/ op deen zijde en(de) de goede gerard(en) doys op dande(re) en(de) dat/ om der reden(en) wille dat de voirs(creven) her jan sijn huys voirs(creven)/ d(air)op als voirco(m)mer genome(n) hadde It(em) en(de) om alle stoot/ te scouwen die namaels gebue(re)n soude moegen om de/ valuacie vand(en) selve(n) twee guld(en) ende oic vand(en) sesthie(n)/ vrancr(ijcsche) crone(n) goet van goude ende swaer van gewichte/ oft de weerde dair af die de selve gabriel totten voirs(creven)/ twee guld(en) jaerlijcx en(de) erflijc heeft op tselve huys des/ voirs(creven) her jans gelijc scepen(en) brieve(n) van loeven(en) dair op/ gemaect dat inhouden Soe sijn de selve p(ar)tie(n) van/ dien verleken dat de selve h(er) jan voir elcken ryns guld(en)/ vijf scellinge seve(n) en(de) eene(n) halve(n) pe(n)ning(en) en(de) voir den scellinc/ tweelf gr(ipen) brabants en(de) voir elcke vand(en) voirs(creven) sesthien crone(n)/ seve(n) gelike scellinge brabants ende dat van des dair/ af onbetaelt uutstaet oft voirtaen verschijne(n) sal [ende niet meer bet(aelt)] ende/ desgelijcx oick int afquite(n) nae der stad ordinan(cien) sonder/ dat men metten brieven vand(en) selven r(yns) guld(en) oft crone(n)/ meer oft min dan voirscr(even) is sal moeghen eysschen/ Ende ter meerder sekerheyt van desen hebben de/ voirs(creven) partien malcande(re)n tonderpande gesedt bij orlove/ tshee(re)n vand(en) gronde Te weten(e) de voirs(creven) her jan/ den voirs(creven) gabriele en(de) sijne(n) sone tvoirs(creven) huys en(de) de voirs(creven)/ gabriel en(de) sijn sone den voirs(creven) her janne de voirs(creven)/ rinte van twee r(yns) guld(en) ende sesthien crone(n)/ geloven(de) malcande(re)n d(air)af genoech doen alsoe dat elcken/ vast en(de) seker sijn moege tot ewigen daghen cor(am) berthe(m)/ moelen aug(usti) iii