It(em) gheert de h(er)toge ter eender en(de) goessen tybe borg(er)meester te/ loeven(e) als p(ro)cur(eur) roelofs roelofs sone wilen roelofs ter ande(re) sijn/ same(n)tlijc v(er)eenicht als vand(er) hue(re)n vand(en) huyse des voirs(creven) roelofs/ geheeten henegouwe dair aen de voirs(creven) gheert uut saken vand(er)/ hueri(n)gen die hij d(air)af voirmaels gedaen heeft tegen collijn de/ ronchijn hoofmeester va(n) chanterain noch hue(re) heeft soe hij seeght/ van s(in)[t] jansmisse naestcomen(de) over drie jairen v(er)volgen(de) inder/ vuegen h(ier)nae volgen(de) te weten(e) dat de selve goessen als procur(eur)/ he(m) die hueri(n)ge alnoch geco(n)senteert en(de) verlingt heeft den t(er)mijn/ van vier jae(re)n nae duytgaen vand(en) voirs(creven) zijne(n) t(er)mijne vand(er) hueri(n)gen/ d(air)af tegen den voirs(creven) collijne gedaen om d(air)af te betalen en(de) te/ gheven jairlix en(de) voirts te doen den tijt due(re)nde allet ghene/ des de voirs(creven) collijn jairlix d(air)af uut saken van zijnder voirs(creven) hue(re)n/ bij he(m) tegen roelofve wilen roelofs des voirs(creven) roelofs vader gedaen/ gegeven betaelt en(de) gedaen heeft en(de) sculdich es te doen(e) op/ vuege en(de) condicie nochtan oft roelof tselve huys by(n)nen den selven/ verlingden iiii jae(re)n selve bewoenen oft vercoepen woude dat/ hij dat sal moegen doen en(de) dan soude dair gheert nae dat he(m)/ dat een jair te voe(re)n opgeseet soude zijn dair uut moeten trecken/ met vorweerden voirt dat gheert de voervynste(re)n sal moegen/ doen nede(re)n behalven dat hij die tsijne(n) afscheyden weder soe/ goet en(de) hoege en(de) in sulken state als die nu zijn sal doen h(er)maken/ en(de) stellen cor(am) buetsele hoelair octobr(is) x