Nae dien dat henrick vand(en) horst barbier als mo(m)boir van/ yden van haecht geheeten vanden male weduwe symoens/ wilen blanckart en(de) vand(en) wettigen kinde der selver yden/ geheeten heynken blanckarts inden name vand(er) selver wed(uwe)/ en(de) hue(re)n kinde en(de) oick gielijs de vos als maech vand(en) selven/ kinde van svaders wegen der stadt raide opgedaen hebben/ hoe dat voirmaels der selver yden met testame(n)te henr(icx)/ wilen va(n) haecht huers oems in pueren aelmoessen(en) gemaect/ zijn seke(re) p(ar)ceelen va(n) goeden en(de) onder den ande(re)n twee boende(re)n/ soe beemts soe boegarts in eene(n) stucke gelegen tophem onder/ pelleberch te diversen tijden en(de) tegen diverse p(er)sone gecregen/ tusschen de goede jans van berthem te twee zijden en(de) de/ heerstrate gaen(de) te dieste weert ter derder En(de) dat zeder/ a(n)no lxxix maii xvi de voirs(creven) wilen symoen huer man/ huer met zijne(n) testame(n)te gemaect hadde en(de) gelaten onder/ den ande(re)n de selve goede om die te hebben te houden en(de) te/ vervolgen en(de) nae zijn doot te aenveerden te v(er)coepen te/ verthie(re)n en(de) van dien tot huer(er) gelieften te dispone(re)n behalve(n)/ dat zij van en(de) uut dien betalen soude alle schulden bij hen/ symoene en(de) yden gemaect en(de) de kercken rechten En(de) want/ de selve yde zeder huers mans doot bij voirgaen(de) consente/ vand(er) stadt e(n)nige vand(en) selven goeden om te betalen(e) de/ voirs(creven) schulden kercken rechten costen en(de) lasten die zij om/ de goede te verantweerden hadde geleden hadde moete(n) v(er)coope(n)/ en(de) de selve d(air)mede betaelt En(de) zij huer en(de) huer kint/ zee(r) qualic mits den over dyeren en(de) swaren tijde conste/ ontdragen gevueden en(de) henen gebringen Te voirde(r) want/ tghene des boven de voirs(creven) schulden overde zee(r) sober was/ en(de) e(m)mer zee(r) luttel oft gheen proffijt en quame vanden/ voirs(creven) beemde en(de) boegarde die jairlix ter hue(re)n niet/ meer en gout dan vive rinssche gulden(en) en(de) acht stuvers/ den rinsschegulden(en) te lx gr(oten) brab(ants) en(de) dairaf weder/ van co(m)me(re)n dair uutgaen(de) aen diverse p(er)sonen betaelt/ moeten worden wel vive rinsschegulden(en) vii(½) stuvers/ / Te weten(e) aen hee(re)n chijs een half blancke Aen arnde de/ briede(re) twee gulden rijders erflijc Aen raese vanden/ borchoven thien molevate c(or)nen en(de) th vie(r) capuyne/ aen de kercke va(n) pellenberch vier stuv(er)s en(de) xii mite(n) Aen/ ghoerde moens vijf stuvers Aen ja(n)ne va(n) berthem xv pont/ al erflijc En(de) aen stasse va(n) haecht xiiii stuv(er)s lijfpensien/ En(de) noch es dit goet metten ande(re)n goeden pant voir een/ mudde core(n)s lijfpensien ten live vanden selven stasse/ Soe begheerden en(de) baden zee(r) oetmoedelijc de selve henr(ic) als/ mo(m)boir en(de) gielijs als maech om den meesten orboir en(de) prouffijt vand(en) voirs(creven) kinde en(de) zijne(n) erfgenamen ende/ oic vand(er) moeder voirt te kee(re)n want zij v(er)hoopten wairt/ datmen den voirs(creven) beempt en(de) boegart ten hoochsten/ v(er)cochte dair nu oft luttel oft niet af en quame boven/ co(m)mer dat dair af wel ove(re)n en(de) meer p(ro)fijts voir hen en(de) des/ kints erfgenamen soude comen dat den selven raedt als/ overmo(m)boir vand(er) wed(uwe) en(de) ombejarden kinde(re)n op datmen/ te bat coopman vynden en(de) den selve(n) coopman te sekerliker/ bevestigen mochte te willen consente(re)n int selve vercoepen/ En(de) want den selven raide de selve bede en(de) begheerte/ nae alle gelegentheyt dairaf den selve(n) genoech te bynnen/ was redelijc dochte en(de) in rechte genoech gefondeert soe heeft/ den selven raidt dair inne op heden openbairlijc/ geconsenteert Bij alsoe dat het alsoe zij dat int selve/ vercoepen e(n)nige m(er)ckelike v(er)overi(n)ge boven de voirs(creven) co(m)me(re)n/ dair uutgaen(de) geschien mach en(de) dat dat geschiede met/ openbaren kercgeboden ten hoochsten prise en(de) meesten orboe(re)/ en(de) proffijte vand(er) moeder en(de) hue(re)n kinde en van des kints/ erfgenamen en(de) naecomeli(n)gen en(de) dat de v(er)overi(n)ge dairaf/ alsoe comen(de) bekeert worde aen seke(re) erfrinten wel bevesticht/ die staen sullen moeten gecocht en(de) aengeleecht wordden/ ter selver natue(re)n dat tvoirs(creven) erve gestaen heeft in co(n)silio/ opidi pr(esen)tibus absoloens tybe burgim(a)g(ist)ris et plurib(us) aliis de/ consilio junii xxviii