Nae dien dat ten versueke lodewijcx speelberchs scepman/ poirte(r) en(de) ingeseten(e) des(er) stadt t(er) eender tot meer stonden/ brieve(n) vand(er) stadt wegen gescr(even) sijn geweest aenden meye(r)/ van werchte(r) ende den gemeynen treckers ald(air) dair mede sij/ versocht wordden den selven lodewijken te trecken(e) sijn scep liggen(de)/ aldair opde dijle op hue(re)n behoirlijken solar(is) soe dat costumelijc/ es dwelc sij hem weyg(er)den tot sijne(n) groote(n) acht(er)deele inder/ maten de selve brieve(n) dat naird(er) inhielden en(de) den selve(n)/ dach bescheyden wert alh(ier) te compare(re)ne o(m)me te seggen(e) de/ reden(en) van hue(re)r weygeringe(n) Tot welken dage als op heden sijn/ gecompareert jan van elsbroeck als meye(r) ende henrick vyncke/ henrick de meest(er) willem diericx ende jan baten als treckers/ der selv(er) plaetsen ende inden name vanden gemeyne(n) treckers/ ald(aer) t(er) and(er) sijden seggen(de) dat sij den selven lodewijken sijn/ scep niet en weyg(er)den te trecken mair hadden verstaen dat/ hij seke(re) (per)missien hadden verworve(n) aenden meye(r) van loeven(e)/ / van sek(ere)n overvae(re)n feyten bij he(m) mesgaen mits den welken sij hoepten/ dat hij niet sculdich en wae(re) noch en betaemde van hue(re)r geselscap/ te sijne seggen(de) dat hij mits dien dair van afgesneden soude wordde(n)/ hen des gedragen(de) tott(er) selver (re)missien bege(re)nde die van he(m) geexhibeert/ te hebben(e) en(de) oic totten sceplieden van leeuwe mechlen arschot en(de)/ diest dat dat altijt ond(er)houden hadde geweest soe wanneer yema(n)t/ e(n)nige van hue(re)r geselscap [wordde] bevonden niet oprecht sijnde dat hij sculd(ich)/ wae(r) afgesneden te wordden met meer woerden bij hen gealligeert/ Dair tegen de voirs(creven) lodewijck exhibe(re)nde sijn r(e)missie hoepte en(de)/ sustineerde de (contra)rie mits seke(re)n reden(en) ende inden yersten hoe dat/ tgene des ind(er) remissien begrepen stont egheen onreyn feyt en/ was want hij niet en wiste wien tgoet toebehoirde en(de) jair en(de)/ dach ond(er) he(m) lach sond(er) dat yema(n)t dair nae vraechde vanden/ welken de remissie mentie maicte En(de) al mocht hijt nae/ der hant geloegent hebben ende sijn wijf een deel vanden selve(n)/ goeden vercocht want lach en verdorff dat en dede sij niet ten/ acht(er)dele vanden ghenen dient toebehoirde want zij den selven/ nae der hant dient toebehoirde dair van v(er)nuecht heeft en(de) bereet/ was de pe(n)ni(n)gen opte leggen(e) dair van gecome(n) sijnde Oic soe en/ was de selve r(e)missie niet alleene gefundeert op tcryen mair oic/ tcuvel alternatie(n) dwelc hij hadde gedaen t(er) meerd(er) sekerh(eit) van hem/ oft he(m) yema(n)t dair van tot ande(re)n plaetsen oft plecken hadden willen/ becu(m)meren oft last aendoen seggen(de) oic finalijc dat hij stont ter/ goed(er) name(n) en(de) famen die hij p(rese)nteerde te thoenen(e) op dats noot/ wae(re) ende p(ro)testeerde vanden injurien die zij hem in desen daden sijnd(er)/ ee(re)n en(de) waelvaert aengaen(de) hopen(de) dair van hem tegen he(m) te richten(e)/ met rechte met meer woerden in wed(er)sijden geallig(eer)t Alsoe dat/ den raed vand(er) stadt p(ar)tien in wed(er)sijden aldus gehoirt hebbende/ bevi(n)dende de sake vand(er) voirs(creven) lodewijke onnoosel en(de) niet alsoe/ te nemen(e) als die [van] werchte(r) voirs(creven) voir hen namen hebben zij [heeft] den/ selve(n) uutgesproken ende get(er)mineert dat die van werchte(r) sculd(ich)/ souden sijn den voirs(creven) lodewijken sijn scep te trecken(e) op sijn p(rese)nta(ci)[e]/ ende den selven lodewijken te laten in hue(re)n geselscape als/ hij te vo(r)en hadde geweest sonder hem dair van stoet oft/ calangie te doen(e) niet wed(er)staen(de) hue(re)n reden(en) voirsc(reven) in/(con)silio opidi julii iii